السبت، 15 يناير 2011

حكاية منى


السلام عليكم ورحمة الله وبركاته
ازيك يا دكتوره ستيته

أبدأ الحكايه ... هي مشكله قد تبدو تافهه للبعض
بس مش لاقيه حد يقولي اعمل ايه
بابا بيسافر السعوديه بقاله 20 سنه طلع السنة دي ع المعاش ف شغله اللي ف مصر ومع انه تعبان جدا وعايش بالمسكنات  الا انه بيفضل يسافر تاني لأنه بيحب الشغل والفلوس :)
طبعا انا مخلصه دراسه بقالي 3 سنين قضيت منهم سنه بحالها هناك معاه ومع ماما
بس زهقت رجعت تاني سنة عملت دبلومه وعشت عند عمي واختى ف نفس العماره متجوزه ابن عمي
تالت سنه عملت دبلومه وماما قعدت معايا عشان اختى كانت برضه بتعمل دبلومه وبنت اختى كانت صغيره لسه فوافق ان ماما تقعد معاها 5شهور
 
المهم دلوقتي بابا سافر تاني(قولي 20)وعايزنا معاه انا وماما تاني ... وانا عايزه اكمل ماجستير وف نفس الوقت ماما مش راضيه تقولي لا تعالي معايا عشان متزعلنيش وعشان ببقى هناك ف وحده بمعني الكلمه لا نعرف حد ولا بنروح عند حد يدوب خروج يوم واحد بس لطلبات البيت ... ومفيش مجال للشغل عشان انا تربيه موسيقى وهناك مفيش موسيقى
مع اني معايا دلوقتي دبلوم خاص علم نفس  ودورات  تخاطب بس برضه مش لاقيه شغل ف الرياض  
 
اصلا بابا موافق اني اخليني ف مصر وماما تسافرله لوحدها
 
واختى موافقه اني اخليني معاها عشان بقعد ببنتها ومتودهاش حضانه
 
انا صعبانه عليا ماما جدا بتبقى هناك لوحدها بابا بيرجع من الشغل الساعه 8
وانها تتكلم معانا على النت مش كفايه
 
هي نفسها تخليها ف مصر مع حفيدتها
بس بابا تعبان وعايش ع الحقن والمسكنات ولازم تبقى جنبه
 
انا مش عارفه اعمل ايه
وف نفس الوقت مببقاش مرتاحه هنا وانا لوحدي ومش ف بيتنا 
وكمان المفروض ابقى مع بابا وماما محدش عارف بكره مخبي ايه  اكيد بعد كدا هعيط واقول كان قدامي فرصه اني اكون معاهم وانا ضيعتها
 
انا بحب بابا وماما ونفسي أفضل جنبهم وبحب اختى وبنتها وببقى هموت عشان بقعد بالسنه مش بشوفها
وبابا مش عايز يرجع بقى (اتعود على هناك ف الغربه) مع اننا اخيرا نقلنا بيت جديد ملك أخيرا وجبنا عربيه آخر موديل
بس آدي البيت بنسكنه شهرين كل سنه والعربيه ف الجراج مش بنركبها ...
 
بنت اختى مرتبطه بيا بجنون انا اللي مربياها بجد
ومش بتحب اي مكان غير بيتنا
وبيجيلها اكتئاب لما بسافر هي طفله صحيح بس والله مبتبقاش بطبيعتها لما ببعد عنها دي وانا هنا لازم اوصلها لحد بيتها واقولها اشوفك بكره عشان متعيطش
 
انا محتاره بجد
هناك .. ماما وبابا ووحده وزهق ومن غير اختى الوحيده وبنتها وتفكير ان العمر بيجري من غير ما أعمل حاجه
 
هنا.. ماجستير وصحابي واختى وبنتها  بس من غير بابا وماما
 
عارفه يا دكتوره لو بابا يوافق اني انزل مصر حتى كل 4 شهور اشوف اختى وبنتها وصحابي  بس احنا
بنقعد ييجي 10 شهور
 عارفه يا دكتوره
احنا مصيفناش من 2003 ومتفسحناش ومخرجناش
الشهر الأجازه بيخلص ف تخليص الورق وزيارات  خفيفه للقرايب وغالبا بيبقى ف الشتا وكل قرايبنا ف
الدراسه ومينفعش نروح اي مكان
 
والله يا دكتوره مش بنعمل حاجه بالفلوس غير اننا بناكل الكويس ونلبس العادي  
طيب ما اغلب الشعب بياكل وبيلبس ايه الفرق؟
 
لو حضرتك شايفه ان الحكايه بسيطه مش لازم تنشريها .. بس قوليلي بجد انا محتاره
ماما زعلانه جدا انها هتسيب حفيدتها اصلا وهتبقى هناك لوحدها واصلا اصلا هي وبابا مبيتفقوش ابدا ودايما مشاكل على اختلاف وجهات النظر فبخاف عليهم وهم لوحدهم
وانا لو سافرت هنرجع على آخر السنة
 
هو انا كدا انانيه عشان بفكر ف نفسي بس؟
 
معلش طولت عليكي يا دكتوره_شكرا لسعه قلبك

هناك 16 تعليقًا:

ستيتة حسب الله الحمش يقول...

أهلا منى
نورتيني والله
مفيش شيء ابن آدم متحير فيه أسمه تافه
أنا يمكن وصل لي رسالة واحدة لم انشرها لأنها كانت نصا شبه اتنين هنا
فقلت صاحبتهم - اللي بأحيها من خلال التعليق- مؤكد شافت ردود الناس وخدت منها اللي يصلح لها

لكن اي مشكلة طالما محيرة لصاحبها فإحنا هنا علشان نتكلم معاه ولا خاب من استشار

تحياتي لك وردي عليكي بليل إذا ربنا أحيانا

Ramy يقول...

الأول

زى ما الدكتورة قالت كدة
مفيش حاجة اسمها تافه

اللى انا اشوفه تافه مهم جداً عند حد تانى

لأن كل واحد فى حياته حاجات ممكن تكون سهله فى حياة ناس تانى لكن كُل واحد له ظروف مختلفه

المهم انا كُنت بأقترح أن انت تنزلى عند اختك و دراستك

الحياة فى السفر بتاكل العمر صدقينى

و محدش بيحس بيها

بس انا مستغرب من والدك الصراحة مش فاهم منطقه

بس انت برضه جبتى حل ال4 شهور
أعرضيه على والدك و أتناقشى معه

و ربنا يوفقك

لكن انا مع العودة لمصر

Unknown يقول...

اينعم المشاكل اللي شبه دي بتبقى شبه دور الدومينو المتقفل م الناحيتين والله يعين اصحابها عليها لان بتبقى كل الخيارات صعبة , بس مفيش مانع نقول اي حاجة يمكن تبقى شبه الاستعانة بالجمهور لحل سؤال صعب
*والدك ووالدتك احوج اليكي من اختك وبنتها
* في الكليات النظرية اعتقد ان الحضور بانتظام في الرسايل مبيبقاش اجباري يعني البروتكول بتاع الرسالة والعنوان يمكن التفاهم مع المشرف عليهم عن طريق التواصل الالكتروني بعد التسجيل وشرح الوضع الاجتماعي للمشرف اللي غالبا حيقدره .
*يمكنك اقناع والدك بنزولك مرة واحدة مع اي اسرة نازلة مصر بعد 6 شهور والعودة معاهم بعد انتهاء اجازته ثم العودة مرة اخرى في الاجازة السنوية لاسرتك
* بيتهيالي ان دورات التخاطب ودبلومة علم النفس ممكن تساعدك في ايجاد وظيفة في الرياض لان فيه مراكز تخاطب , بس رسالة صغيرة من شبكة الاتصالات السعودية لاي جريدة اسبوعية في الرياض زي الوسيلة ممكن تؤدي لنتيجة ما مع الحذر من المضايقات بوضع رقم تليفون والدك
*التواصل مع الاصحاب ع الفيس بوك احد الوسائل التعويضية وخصوصا ان 6 شهور مش حتبقى فترة طويلة ممكن تبقي في مصر ومتشوفهمش سنة
*حاولي مع حد ليه تاثير على والدك يقنعه بالعودة والاستقرار
*الرياض مليانة اماكن لفسحة اعتقد ان والدك مش حيمانع لو ضغتوا عليه شوية ( حديقة الحيوان -حديقة الملك فهد - برج المملكة .......نزول عمرة كل شهرين او تلاته
*يمكن عمل علاقات اجتماعية مع عائلات زملاء الوالد كنوع من الحلول التصبيرية في الست شهور
*الوضع كله مؤقت ان شاء الله يتغير قريب ويكون ليك اسرة مستقلة يعني متشليش هم حاجة حتخلص قريب باذن الله
**شكرا دكتورة على فكرة المدونة(قلب خساية )

أنا - الريس يقول...

بصي يا ستي حاجة من 2 في رأيي وإن كان في حجات تانية كتير
1- تروحوا إنتي ومامتك وتقعدي هناك وتحاولي تعملي حياة هناك .
2- تقعدوا كلكم هنا وتحولوا تفهموه ويا تقنعيه يا يقنعك .

وعلي فكرة ممكن تعملي دراستك وإنتي هناك . عن طريق السفارة دي معلوماتي
ربنا يوفقك ويسعدك ويصلح حالك قادر يا كريم

غير معرف يقول...

منى - صاحبه الحكايه

استاذ رامي - اولا شكرا لحضرتك

ثانيا فعلا معاك بشده السفر بياكل العمر انا أبويه بيسافر بقاله 20 سنة ف ال 20 سنه دول كرهت السفر والفلوس عشان كدا مش عايزه اسافر انا كمان وعمري يجري وأحس اني مانجزتش حاجه

منطق بابا انه ف مصر فاضي مفيش شغل وهو مش بيعرف ف المشاريع
وابويا مش بتاع مناقشه خالص ومبعرفش اقنعه او هو مبيقتنعش برأيي

شكرا ليك يا استاذ رامي كمان مره

غير معرف يقول...

منى -صاحبه الحكايه
لـ واحد من الناس
أحييك تشبيهك اللي فعلا شبه حكايتي
دومينو لما بتقفل
شكل حضرتك خبير ف السفر أو سافرت السعوديه قبل كدا
* والدي وأمي فعلا محتاجني دا حقيقي لكن لحد إمتى يعني انا لو أجلت الماستر السنة دي وسافرت هي نفس الحكايه السنة الجايه مش هتبقى غير مجرد تأجيل

* بخصوص النظري والتكميل انا لسه بعمل فكره حتى لسه مسجلتش رسمي بس ف اول فرصه بسافرلهم على طول

*عارف حضرتك هيقولي هتروحي مصر لوحدك ليه عشان فسح وتصييف مش هينفع اعملهم غير وهو معايا يبقى استنى لما ينزل معايا مصر :)

* بخصوص الشغل فعلا بعت ف جريده الوسيله وكل اسبوع ابعت ال cv ييجي 10 مرات واروح مقابلات بس مفيش نصيب وبابا اصلا مش عايزني اشتغل عايز يريحني :)

* بالنسبه للتأقلم هناك واماكن الفسحه فهي كتييييييير والرياض تحفه انا بحبها جدا بس بابا زي ما قلت تعبان ومش بيعرف يمشي غير يدوب المشي ف المولات للضروره وتعبه دا بيخليه يستنى يومين الأجازه عشان ينام ويريح رجله مينفعش انا بقى اضغط عليه وانا شايفاه كل 5 دقايق يتوجع ومش قادر يستحمل وأقول تعالى خرجني ومعندناش سواق يخرجنا وحتى لو فيه مفيش متعه للخروج وهو مش معايا
----------------
شكرا جدا لحلولك المنطقيه بجد
--------------
انا حاسه انكم هتقولوا عليا بقفلها من كل النواحي بس انا بحكي التفاصيل عشان تعرفوا اني مش بتدلع والله

ebn roshd 777 يقول...

د ستيته وحشتينا بجد ويارب تكوني وكل اسرتك الكريمه بكل الخير والصحه
مع اني مش متاكد بس يبدو ان حضرتك عملتي مدونه اسالوا ستيته واصحابها؟؟؟
اما عن المشكله المعروضه فصاحبتها اوجزتها في كلمتين عبروا عن حجم الماساه التي تعيشها وذلك عندما تحدثت عن قيمه النقود في حياتها وحياه اسرتها وبالتالي فاصرار والدها علي السفر لا معني له وعلي فكره انا اعرف حاله مشابهه جدا والنقود بالنسبه لهم اصبحت لا قيمه لها بسبب وفرتها
الحل برايي هو مواجهه الاب بضروره العوده لمصر
ولكن قد يكون الاب مثلنا جميعا قرفان من البلد واللي فيها وهنا تكمن المعضله
ربنا يهيئ لصاحبه المشكله ولوالدها كل الخير باذن الله

Unknown يقول...

السلام عليكم يا منى أنا هكلمك عن خبره لأني قضيت بعض عمري في السعوديه بردو و عارفه العيشه هناك عامله ازاي
بصي يا بنتي انت مينفعش تعيشي هناك طووول السنه مش عشان اختك و مش عشان مامتك لكن عشان مستقبلك هنا سواء الدراسه أو الزواج و لا أنت عايزه تتحبسي أجمل سنين عُمرك بين أربع حيطان دي مش أنانيه دي طبيعة الحياه مسيرك هتتجوزي و تسبيهم هتلومي نفسك ساعتها؟
و بالنسبه انك نفسك متبعديش عنهم حاولي تقنعيهم بالنزول نهائي بالعقل و بالعاطفه و اذا فشلتي معاهم اعكسي خليكي فمصر 10 شهور و سافريلهم شهرين في السنه و هما شوية شويه هيحسوا انهم محتاجين ينزلوا يستريحوا في بلدهم و يستمتعوا بيكم

ادرسي و اشتغلي و استمتعي بأصحابك و حياتك بدل ما تضيعي عمرك محبوسه و متخافيش على مامتك الأهل غالباً مُعدين نفسياً لبُعد الأبناء فقط حاولي متغيبيش عليهم و ربنا يجمعكم قريباً البعد شئ قاسي جداً و المطار في رأيي أسوأ مكان ربنا معاكي

جايدا العزيزي يقول...

انا كمان من رأى تسافرى مع والدك والدتك وتكونوا دايما جنب بعض لان الترابط جميل وبيساعد على النجاح

وممكن تكون ليك صدقات كتير هناك

طبعا انا بعشق مصر جدا ورفضه فكرة سفرى لاى دوله اخرى

بس لو كانت ظروفى كظروفك ساسافر فورا واكمل دراستى مع اهلى

ارجو منك دكتورة ستيته ان تجدى حل فى تعليقات مدونه عارفه

لانه يصعب عليا التعليق بحساب جوجل

تحياتى

ستيتة حسب الله الحمش يقول...

أهلا منى
وأهلا بكل من جانا وعلى رأي اخواننا في الخليج حيا الله من يانا

شاكرة لكم مشاركتكم ومقدرة مشاركة اخويا ابن رشد الغائب من مدة كبيرة .. الحمد لله اني اطمنت انك بخير

نرجع لمنى

الحقيقة يا منى أنا معرفش احنا كشعوب فينا صفات عجيبة جدا
منها
1- ان انتي عندك 24 سنة ومع هذا لازم تعيشي مع بابا وماما
يعني ايه فعلا تعيشي في السعودية
ماهو انتي لو لك كارير هناك وبتكوني نفسك او حتى محتاجة تكوني نفسك كنت فهمت
لكن انتي في أحلى سنوات حياتك
محتاجة مجال عمل وده في مصر
محتاجة تكملي دراسة وده في مصر
محتاجة تكوني صداقات حقيقية بعد طول الغربة وتؤدي بالتبعية لتكوين اسرة وده طبعا برضه في مصر
متاجة تعيشي وتتفسحي وتنطلقي بما يرضي الله فقط وده مش موجود حسب ظروفك الا في مصر
محتاجة استقلالية لأن سنك مش صغير وعديتي سن الحضانة من بدري وكل ده في مصر

2- من نفس مبدأ حرية تقرير المصير وان كل واحد حر في نفسه
مش مطلوب ان بابا يرجع
يمكن تصدمك الحقيقة دي بس هو مش قاعد هناك دلوقتي علشان الفلوس
قاعد لأن له عمل وهو لا يستطيع البطالة بعد طول الشقا
وقاعد لأنه اتعود على طبع المجتمع هناك
ببساطة السعودية بقت بيته وناس كتير جدا زيه
حتى لو ناقشتيهم وقلتي لهم نرجع وانتوا مش محتاجين هم مش فاهمين احنا بنقول ايه

هم مستقرييييييييين
ناس اصبح لهم كيان هناك ووجود وعادات ومش ناويين يرجعوا

لو انتي النهاردة زوجة زي اختك
1- كانت مامتك ظبطت امورها مع والدك بما يلائمها واتفاهموا حول مكان الحياة
2- خرجتك تماما من حسابتها
3- قرروا لأنفسهم اللي يريحهم دون حاجة لوجود بنت جنبهم
4- جم شافوكم كل ما يقدروا وخلاص
لأني مش عاجبني لومك لنفسك وانك لازم تكوني جنب ماما علشان وحدتها
ماما مش وحيدة وربنا يخلي بابا
ولو هي استحالت عيشتها هناك تأكدي ها تنزله
ده احنا الستات جبابرة
لكن هي اسهل لها انها تضغط عليكي انتي عاطفيا دلوقتي لأن بابا اصعب منك

انا رأيي اللي ها يبان أناني اقعدي
واستقري
ودوري على شغل مش بس بنت اختك
لأ شغل حتى لو أخذتي له كورسات في تخصصات تانية وحتى لو راتبه متواضع
الشغل ده تحقيق ذات ومهم جدااااااا
وخدي ماجستير ينفع في شغل مش تضيع وقت
وعيشي وربنا يرزقك بسرعة زوج صالح مستقر تبني معه حياة هانئة ان شاء الله
وحاسبي على نفسك لأنك مطمع فلا تأمني إلا لإبن الناس كريم الأصل المتدين
ودمتم
وبالله التوفيق
تحياتي

Unknown يقول...

د/ ستيتة
الاخت مني

الاخوة المعليقين

أرى والله أعلبم وهذا رأيى الخاص أن أفضل حل لأختنا مني هو الزواج
نعم الزواج
الزوج هو الحل الامثل وبهذا تكون لها حياتها المستقلة الواعدة بحيث مع الزواج تستطيع ان تكون لها أختيارات أخرى وهى أم العيش مع الزوج بمصر وأستكمال دراستها ولو ربنا كرمها وخلفت هتكون الحياة مختلفة ولها طعم خاص وأذا كان مصلحتها هى وزوجها في السفر تكون حياتها في السفر مختلفة أيضا ويمكن أن يساعد أبها زوجها في السفر حيث أنة له مدة طويلة في الخارج وبهذا تكون الحياة في أتجاه صحيح وهو الاتجاه المنشود
لذا أطلب من أى أخ وأى أخت التقدم بطرح بعض العروض علي أختنا بأشخاص مناسبيبن لها من الناحية العلمية والثقافية
وهذا ليس فيها أي عيب ولا حياء

والله أعلي وأعلم

richardCatheart يقول...

معلش يا منى ماتزعليش منى بس فى انانيه شنيعه من حيه ولدك وولدتك
ستيه ست الستات قالت اللى كنت هاقوله بس بأسلوبها الجميل المقن كالعاده

اعتقد انهم خلاص عاشو وعملو اللى عايزينه فى الدنيا
واجب مامتك تكون جنب بباكى فى ظروفه

وانت كمان من حقك تعيش حياتك ونظميها زى ما انت شايفها

واختك اللة مامتها سيبها انتو ونس لبعض
ماتسفريش وسيبهم يظبطو امورهم وانت ظبطى حالك هنا
افتحى شقتكم واقعدى فيها وابقى مابنها ومابين بيت اختك وهى معاكى اهو تغير

انت مش هاتقدرى تغير فكر بباكى
خلاص
انما تقدرى تمارسى حقك اللى لو اتنزلتى عنه من دلوقتى مش هنلاقى حياتك بعد كده
وهاتندمى حقيقى

ربنا معاكى ويلهمك ما فى الخير ليكى

ツSmiLeY AnGeLツ يقول...

منى حبيبة قلبي
سافري مع امك وابوكي دول ملكش غيرهم
والله حاسه بيك وبالعيشة بالغربة مجرباها دي بجد تقصر العمر وتضيع عليك اجمل اللحظات مع الاهل بس دي امك ولاتعصي امك
بر الوالدين
رضى الله من رضى الوالدين
واكيد ربنا بيكرمك ويرجعكم مصر وبتعيشوا فيها كلكم بقيت عمركم
يارب تقدري تقرري مصيرك
وحطي امك في بدايه كل قرار تاخذيه
تقبلي مروري
ربنا يفرجها عليك
ماضاقت الاوفرجت
سلامي لاجمل منى.

ويكا يقول...

منى

والله انا رأيى من رأى واحد من الناس تماما
واوعى تنسى انك فعلا خلاص هانت اهه وان شاء الله هيبقى ليكى بيتك لوحدك

اما حكاية قعادك عند زوج اختك دى مش لذيذه خالص من كل الواحى بصراحه

وقعادك لوحدك فى بيتكم طبعا ما تنفعشى برده خالص

وصدقينى
مهما روحتى ولا جيتى وقعدتى لوحدك وعملتى ايه

صدقينى يا بنتى ولا يوم من ايام وجودك جنب مامتك وباباكى

بغض النظر عن لو استحضرتى النيه كمان انها من باب بر الوالدين
والله ربنا هيعوضك فى الدنيا والاخره
وهيقلبلك دنيتك سعادة وهنا

اما وجودك بدون اب وام فى مصر لوحدك بعيد عن بابا وماما صدقينى لن يعوضه شئ ، واذا غلب القضاء لايهما او كلاهما ، والله هتندمى جدا جدا جدا على الوقت اللى فاتك بعيد عنهم

حلول واحد من الناس كويسه وفيه اقتراحات تانيه كتير بس مش هقلك عليها لان مش هينفع تاخدى الحلول كلها على طبق من فضه كده وتختارى
لان ساعتها برده هتختارى غلط
لازم تحددى اتجاهك الاول وبعد كده تفكرى هتتعاملى معاه ازاى

غير معرف يقول...

منى - صاحبة الحكاية

اولا بشكر كل من افادني برأيه
ابن رشد وشيرين سامي وجايدا وعلى يونس وقلب القطه وخواطري مع الحياة مع حفظ الألقاب طبعا
------------------
بجد يا دكتوره كلامك ريحني جدا انا كدا 80% هقعد ف مصر عند عمي وأختي وماما هتسافر لبابا
كلامك كله صح جدا وحقيقي وواقعي
هم فعلا شايفني طفله مينفعش أكون لوحدي

بس هرد على خواطري مع الحياة
انا عمري ما عصيت امي وأبويه انا أي حاجه بعمل اللي يريحهم هم مش العكس وهم موافقين وراضيين اني افضل ف مصر وسألتهم اكتر من مره راضيين عني ومش زعلانيين قالوا لا دا مستقبلك وحياتك

وردي لقلب القطه -- ياريت اقعد ف شقتنا بس بابا مش موافق اعيش لوحدي مينفعش طبعا ومع اننا عندناةشقه جاهزه لأختي ب جوزها مش عايز يسيب شقته محدش هيسيب بيته عشان خاطر حد

استاذ علي يونس - انا عارفه ان نيه حضرتك خير بس كدا هنقلب الموضوع اعلان زواج :) مع ان ف رأيي دا مش حل طيب فرضا انا متجوزتش هفضل عايشه ف نفس الحكايه لحد ما والدي يقرر النزول نهائي

--------------------
مش عارفه أقولكم ايه وبالذات ليكي يا دكتوره ستيته ربنا يخليكم ليا يارب صحيح الآراء كانت متفاوته بس انا الحمد لله عرفت اني كدا مش انانيه

شكرا ليكي جدا يا دكتوره ربنا يباركلك ف اولادك وحياتك

-----------

غير معرف يقول...

استاذ ويكا

هوضحك لك بس حاجه انا عمي يبقى ف نفس الوقت زوج خالتي وعايشين لوحدهم ف البيت وليا غرفه لوحدي واختى ف نفس العماره يدوب بطلع آكل عندها وخلاص ... لو كان حاجه غير كدا مكنتش هقعد عند حد غريب

عايزه أقولك ان الوضع مش مؤقت بابا مش عارف هيرجع امتى

انا صحيح بخاف من اليوم ان ميبقاش معايا وجنبي حد

بس حضرتك عشان راجل مسموحلك تسافر عادي تشتغل وهتسيب اهلك كتير شباب كدا ومحدش بيقلهم حاجه عشان هم رجاله حتى لو اهلهم محتاجينهم
انا بقى طول عمري محتاجه بابا وهو بعيد مش انا اللي مختاره السفر عشان اتحمل تبعاته النفسيه

سفر بابا دلوقتي مش عشان فلوس عشان شغل وبلد كويسه ورفاهيه ف المعيشه

اقرأ ردي على واحد من الناس هتفهم قصدي انا هناك ليه مش مبسوطه

------------------
شكرا ليك وشكرا للدكتوره الجميله
انا بحبك ف الله بجد يادكتوره

وان شاء الله أقولكم انا استقريت على ايه وقراري ايه