الثلاثاء، 14 ديسمبر، 2010

حكاية مكررة وإيه الحل

ألف مبروك على المدونة ويارب دايما ناجحة
متأكدة من غير ما أفكرك ان اسمي وصفتى مش للنشر
حتى انا مش عارفة ليهانشر الحدوتة ولكن الفضفضة دى مش ها تضر ويمكن تنفع
أنا زوجة من خمس سنوات وأم لطفلين وحامل في الثالث
جواز عادى من راجل محترم بلدياتي مدرس والكل بيشكر فيه وكان راجع من الخليج ومستعد للجواز 
انا خريجة جامعية واشتغلت شوية في السكرتارية لحد ما اتجوزت ومش ها اقول لك من عيلة محافظة ها اقول لك كفاية تعرفى ان اخواتى الرجالة الاربعة كانوا بيتناوبوا توصيلى للمدرسة واحضارى من الجامعة والدروس واشتغلت عند قريبى في مكتبه واتجوزت زميل اخويا
يعنى عمرى كله فى دايرة العيلة بس
مش كنت ساعتها متضايقة من حاجة ولا حاسة باى حسار او الكلام اللي البنات بيقولوه
كنت عايشة وماشية في دراستى وخلاص
النهاردة طبعا حاسة ان عمرى ضاع في الهوا ولا عشت شبابى قبل الجواز ولا بعده

زوجي واحنا مخطوبين ومرة قاعدين لوحدنا في قعدة صفا قال لي إني مش ها أكون زوجته الوحيدة 
وتكلم معي عن ضرورة التعدد وإنه سنة وهو الأصل في الزواج
ها اقول لك اني فهمت ساعتها حاجة؟ ولا حاجة
اصلا كان كل كلامنا في ايام الخطوبة عن وجهة نظره هو في كل الامور
وانا كنت صغيرة ومعجبة أوي بالراجل ده اللى له شخصية ودايما عنده حل وفكرة لكل موضوع
مراية الحب بئى وكمان الخبرة صفر
قلت دي مجرد كلام ووجهة نظر وبكرة ينسى الكلام ده لما نكون في بيت واحد وأراعيه
عارفة إنتى أحلام الحب وعلى عش الحب وهوى ياهوي
الكلام ده اللي بيضحك علينا الجرالة

المهم اتجوزنا وبيتنا يكاد يكون خالي من المشاكل إلا اختلافات وجهات النظر العادية في كل بيت
انا قعدت في البيت علشان هو شايف وظيفتي الأولى البيت
مع إني كنت بشتغل وانتي عارفة يعني ايه تمدي ايدك وتطلبي مصروف ويبدأ الفصال يشتغل وكأن الزوجة دي بتشحت
انا خلفت تلاتة في ست سنين (على ما أخلف ها اتم ستة) علشان هو بيحب العيال ووحيد امه وابوه وعاوز عيلة كبيرة
ببساطة كده اي شيء بيفرحه في الامور الكبيرة دي بعمله من غير ما افكر كتير 
وطالما بنفضفض حتى اللي بصمم مش اعمله بعد شوية بعمله برضه مهما قاومت
لأنه لما بيخاصم ممكن يقعد شهر اتنين تلاتة - المدة اللي تقوليها - من غير ما يكلمني ويرد علي بشكل جاف ويرفض ازور اهلي ده غير اني مش بعرف اطلب طلب لأني زي العيال معاقبة
والمرة الوحيدة اللي صممت مهما عمل ان الموضوع مش ها يتم
كان موضوع الزوجة التانية اللي عاوزها تشاركني بيتي
ايوه نفس بيتي
ومين قال انى اساسا موافقة
لأ انتى وافقتى وانا قلت لك قبل الجواز وبعدين مش باخد رايك ده اللي ها يحصل
الخصام مجبش نتيجة
جاب عائلتي اللي نظروا لي باحتقار انى وافقت اتجوزه على الشرط ده
واحلف لهم انى مش اتخيلت انه بيتكلم جد اساسا محدش مصدق
الاول فضلوا ضدى شوية وحاولوا يسايسوة
دلوقت طلع جنونهم وقالوا له ها نخلعها ونرمى لك ولادك وها تتجوز سيد سيدك
من كام يوم كان بيستفزنى علشان عاوز يمد ايده على
الجنين في بطنى بيتخانق من كتر بكائى ليل ونهار على القصة دى
عائلته ولا بيحلوا ولا بيربطوا دول زي ما يكونوا فرحانين في خراب بيتى


ليه
انا بس بسأل ليه
بيت وقائم
وبنين وبنات
ولسه مش وصلنا لسن يتقال فيه انه زهق او اني عجزت او اى حجة من المحفوظين
هو ليه محبنيش مع انى والله مش وحشة وكان بيتقدم لي شباب من ايام اولى جامعة بس بابا مكنش بيرضى الا لما اخد شهادتي

اهلى: مش مديني وش
مش عارفة خايفين اني اطلق وازق فيهم ولا قرفانين (زي ما بيقولوا) من انى خبيت عليهم كلامه
اهله: بطلوا يكلمونى علشان مش ادخلهم في قصص ويخسروا ابنهم (هم اللى قالوا كده)وانا بطلت اشكى لهم
صحابى: مفيش
ماما مش خلت لي صاحبة حقيقية علشان البنت بتخصر البنت والكلام اللي انتى عارفه ده وكل صحباتى هنا فى المدونات
حاسة ان كلامهم وكلام الكل مش بيغير حاجة مهما حاولت ومهما عملت حاجة تقربه منى بس ولو يحس بيا شوية
اول الحمل التالت قلت ها يفرح ويفرحنى وخاصة انه هو اللى عاوز عيال كتير وربنا يخليهم 
اخر الاخبار بيعرف بنت من بلدنا عندها 17 سنة واهلها عرفوا وهو قال راح لهم وبيخطب

ولادى صعبانين عليا وازاى اسيبوهم واهلى لو خدونى ها يسيبوا له العيال
اساسا يعنى لو بشتغل ها اشتغل بكام
اللى كنت باخده واللى اكتر منه مش يصرف على اربعة
ونفسى صعبانة على قوى ومبقاش خلاص فى عينىا دموع 
مفيش حيلة ولا فكرة الا ونفذتها
الناس بيجيبوا القلب الجامد ده منين
عاوزاكى تدعى لى جامد ربنا يحلها من عنده
حسبنا الله ونعم الوكيل

هناك 21 تعليقًا:

richardCatheart يقول...

اولا قلبى معاكى طبعا مأساه بتعرضلها كتير من نساء بلدنا للاسف ويمكن فى اخر تجمع مع ست الستات ستيته دار بنا حوار ان مثل هذه الحالات المقهوره سواء من الاهل او الزوج اوالاتنين معا

الحل الاول بأيد ربنا نسال فك كربك ويديلك الحال يارب

عايزه رائى اخلعي بجد بدون تردد انت فرطتى واتسالتى فى الاول بلاش فى الاخر ودا علشان ولادك وبعدين انت انت كنت بتشتغلى حاولى تشتغلى تانى واستقلى حاسيسيه ان باعك قراط وانت بايع 24 قراط اما احساس البيع دا يخليه يرجع ويعرف انك بتخدى موقف وقت الجد او يعند ويعمل اللى فى دماغه وساعتها ماتبكيش علي لانه مايستهلش

وعلى رائى المثل اللى مايحطنيش كحل فى عينه ماستعنوش جزم فى رجلى

ربنا يديلك الحال

الحب الجميل يقول...

فعلا حكاية متكررة فى زمانا الاسود دا

فعلا موقفك صعب جداا
وحله أصعب
انتى مش زوجه بس لكن أم يا حبيبتى
مينفعش اقولك سيبك منه وخدى عيالك وروحى عيشى مع اهلك
لان ساعتها ممكن يغلس عليكى وممكن ياخدهم منك وممكن اهلك ميرضوش يربوا العيال

وفى نفس الوقت ممكن تكملى مشوارك لحد الاخر عشان خاطر عيالك بس
فين انتى ؟؟؟
ربنا يصبرك يارب
اصبرى
ربنا يفك همك

ولو تقدرى تسيبى العيال وتبعدى
بقولهالك وانا قلبى بيتقطع على العيال
احساس الامومه والبعد عن الابن او البنت بيكون صعب

اتمسكى بعيالك لاخر لحظه فى عمرك
اوعى
عيالك الاهم منك دلوقتى

ياما امهات كتير مستحمله العيشه عشان عيالهم

بس كل واحد باختلاف الموضوع
اللى عايز يتجوز
واللى مفيش بينهم غير كل نكد وهم
مفيش وفاق بالمرة

لا حولا ولا قوة الا بالله
صلى صلاة استخارة وادعى من الله ربنا ييسر لك امورك ويسهلها لكى
اللهم امين



عشان كدا بنصح اى بنت تكمل شغلها بل وتشترط عليه انها تشتغل بعد الجواز

الشغل سند للست فى حياتها
عشان مش تمد اديها لاى حد وتكون مكفيه نفسها ولو حصلها اى ظرف تقدر تكمل المشوار

ادعو من الله
ربنا يهديهولك يارب

سواح في ملك الله- يقول...

اختنا الفاضلة
هاقول رايي بايجاز
ويارب اقدر اوصللك فكرتي
استعملي كل حقوقك القانونية
في سبيل ردع زوجك عن افعالة
وقوليلة اتزوج زي منتا عايز بس
حقوقك كامله
انتي واولادك لازم تاخدوها
حاولي تقفي مرة واحدةوقفة جادة
لان زوجك هذا من خلال ماحكيتيه لو احس بجديتك وانك غير مهتمة بالزواج ومهتمة
بحقوقك وحقوق اولادك
لازم هيقف وقفة مع نفسة
واعلمي يااختنا وهذا ليس من باب
التشجيععلي العصيان
ولكن من باب انك لازم تحافظي علي بيتك بكل الطرق دون استضعاف حتي لو هو مش هيبقي موجود فيه يبقي ملتزم بمصاريفك ومصاريف اولادكو انك لو تهاونتي هذه المرة فلن تقوم لكي قائمة معه بعد ذلك

شيرين سامي يقول...

بصراحه مشكله آلمتني جداً جداً و مش عايزه ألوم صاحبة المشكله أولاً لأنها عارفه انها غلطانه و محدش يقضي فترة الخطوبه هيام في هيام و متخدش بالها من عيوب فادحه في هذا الزوج(والله مش طالعه مني)
ثانياً لأن أي لوم مش هينفع بحاجه دلوقتي...بصي أنا عندي رأي بما اني قريبه من نفس عمرك الزوجي
خليكي في بيتك متسيبيهوش أبداً استحملي و اصبري صبراً جميلاً اشغلي نفسك بولادك و اعتبري انها فترة اختبار من ربنا عامليه كأخ قاسي طبعاً مفهوم يعني ايه كأخ و سبيه يعمل اللي على هواه
لو جابها البيت حياته هتبقى جحيم و انت بولادك أقوى منها مهما حصل أنا عارفه ان ده حل فيه انتحار لنفسيتك لكن لو هو ربنا هداه هيحس بقيمتك و ينشغل بمولوده الجديد و ينسى موضوع الهباب التاني ده أما لو استمر فمعندكيش غير انك تنفصلي عنه و ده آخر الحلول لأنه أبغض الحلال و لأنه فيه دمار لنفسية أولادك
مش عارفه أقولك ايه حاولي متبكيش قدامه و متحسسيهوش انك ضعيفه انتي قاعده في بيتك و اللي عايز يخربه هو اللي يخرج بره
صحيح أنا شوفت بنات انفصلوا حياتهم بقت أفضل بس كانت ظروفهم أحسن منك (مفيش ولاد أو طفل واحد و أهل متفهمين جداً)
عشان كده بنصحك تصبري و تدعي كتير الدعاء بغير القدر و ربنا معاكي ان شاء الله

وجهة نظري يقول...

بما انك معندكيش قوة الإجبار سواء عائلياً أو مادياً انك تمنعيه من الجوازة التانية، يبقى الحلول المتاحة محدودة في ضمان معيشتك انتي و أولادك بس. فكرة تخلعيه وتسيبيله أولادك والكلام دا تنسيه خالص، انتي محاصرة في الحلول اه، بس مش كتعة ولا خرسة ولا عايشة في الصحرا.

انتي أول حاجة لازم تعمليها انك تروحي لمحامي تاخدي رأيه، قدامك لو أصر يتجوز تطلبي الطلاق للضرر وهو ملزم يتحمل أجرة سكن مناسب ونفقة ليكي وللأولاد، وقدامه على كدة ييجي ١٠ سنين. والحل التاني انك تفضلي فالجوازة وترفعي قضية تمنعيه يجيب مراته التانية تعيش معاكي، ودلوقتي القضايا دي بيتحكم فيها فوراً. بس لازم تنسقي مع محامي الأول.

أهلك موقفهم سلبي جداً، ولازم تدخليهم في المشكلة فوراً بأي طريقة، أبسط حاجة تقنعيهم يساعدوكي مع المحامي، دا أقل حاجة تتعمل، وتحاولي تكسبيهم لأن مشكلتك جزء من مشاكلهم وهما إلي حايشيلوا المصيبة لو الدنيا مشيت غلط. دا بدل مياخدوه جوز اقلام وشلوتين يا ناس؟؟؟

وبلاش عياط والنبي، دي اسمها كدة خيبة، ماهو كل ميشوفك بتعيطي يفرد ريشه زيادة.

سيبك من قصة حيتجوز، يتنيل يتجوز ويشيل لو راجل، بكرة التانية تديله بالشبشب علشان غيرانة منك، وخصوصاً انها لسة عيلة عندها ١٧ سنة. حقه يتجوز بالدين والقانون، وحقك العدل والمساوة والخصوصية في حياتك، والحاجات دي عايزة برود ونفس طويل، والله لو عدل وساوى بينكم وخدتي حقك مظبوط كان بها، غير كدة ليها كلام تاني.

انتي غيرانة؟؟ تبقي بتضيعي وقتك وحقوقك وحقوق ولادك، هو أصلاً ناوي على كدة من الأول، ومهوش ليكي، قضاء الله، ولا حول ولا قوة إلا بالله، يبقى تجمدي علشان نفسك حتى يقضي الله أمراً كان مفعولاً. و ربنا يهدي أهلك ويهدي الجميع للسبيل الحسن.

وأوعي حسك عينيك أسمعك بتقولي تاني إنه قالك قبل الجواز إنه حيتجوز تاني .... انتي عمرك مسمعتي الكلمة دي ولا تعرفيها .... "يعني معقولة يا ناس يقولي كدة وأوافق؟؟ هو أنا مجنونة ولا كنت بايرة؟؟ لأ طبعاً مسمعتش الكلام دا قبل كدة؟ هي مكتوبة في عقد الجواز؟ وريني كدة، لأ مش مكتوبة .... فتشني فتش" .... تكذبي؟ آه إكذبي، في دي إكذبي.... ولا هو وعد ولا هو ندر ولا حيفيد غير في أذيتك انتي شخصياً.

بس خلاص، هي دي النصيحة إلي كنت حقولها لبنتي لو كانت مكانك.

واحد من الناس يقول...

الله يفرج همك

غير معرف يقول...

ربنا يفك كربك وكرب كل المهمومين ويهديلك جوزك

هراء لا داعى له ..... يقول...

كل الكلام إللى إتقال دا فى الردود طالع من الدماغ و كل واحد ماشى على هواه


الأفلام و المسلسلات الجميلة خربت عقولنا و بثت فى دماغنا أفكار هدامة دخيلة لكنها إكتسبت من القدم إللى يخليها تبان و كأنها أفكارنا إحنا



و فيها إيه يعنى لما يتجوز تانى ؟


التساؤل دا لو طرح بمعزل عن الأفكار الفاسدة إللى منتشرة فى الإعلام الفاسد و فى المجتمع الأفسد منه


هنلاقى الموضوع بسيط و مش متعلق بمشاهد الصويت و العويل و مشاعر النواح و الإستشهاد المزيف إللى بنصنعها لنفسنا


طبعا أنا عارف إن ناس كتير تتكلم عن الرجعية و الذكورية و المهلبية

بس مش لازم أدخل أغنى مع الموجة


الحياة مش هتتغير كتير لو جوزك إتجوز تانى


و زى ما إحتمال تبقى أوحش برضه فى نفس الإحتمال إنها تبقى أحلى



مش هيجيبلك وحش من الغابة و لا هو هيتحول لديناصور

هو هيفضل بنى أدم

و هيتجوز بنى أدمة

ممكن تكون لطيفة و ظريفة و تبقى زى صاحبتك و تبقى أنيسك و تبقى أنيستها و يبقى ولادها إخوات ولادك و عزوتهم و سندهم فى الدنيا و فى المستقبل بعد ما تموتوا

و لو مكانتش كدا ....هتقدروا تحطوا لبعض قواعد عامة تحترموها ما بينكم و خلاص


الدنيا مش هتتهد

جوز الواحدة زى جوز الإتنين



و فعلا هو عنده حق

الأصل فى الشرع هو التعدد


و دا لحكم كتير نفسية و إجتماعية و دينية أكيد ربنا إللى خلقنا عارف الكتالوج بتاعنا أحسن من الأفلام و المسلسلات إللى اليهود بيعملوهالنا علشان نتربى على أفكار معادية للدين و لأفكاره




أى حدث فى الدنيا ممكن طريقة تعاملنا معاه و إستقبالنا ليه تفرق فى نتايجه


الناس إللى بتقولك إتطلقى .... دا حل سخيف جدا و المفروض ميحصلش غير لو كان جوزك دا إنسان معدوم الأهلية أو الأخلاق أو الإنسانية

و معتقدش إن كل دا ممكن نقوله على واحد عايز يتجوز تانى


ولادك هيضيعوا ضياع حقيقى إذا كان الولاد إللى فى عائلات متماسكة بيضيعوا

إنتى لسا فى عمر الشباب و هتكملى حياة وحدة و معاناة لوحدك لسنوات فوق الطويلة


صعوبات نفسية و إجتماعية و مادية


طب و ليه كل دا ؟؟؟!!!


المسألة بسيطة





بس التفكير فى كلام الناس و القوالب النمطية عن القضية هو إللى بيخلى الإنسان يجلب تعاسته على نفسه بإيده

غير معرف يقول...

Oh my god .walla i don't know what to say other than YOU Are NOT WEAK .You are strong .Leave This loser and do your best to keep your kids wa allah ma3aki.

مدونه ما كفايه بقى يقول...

السلام عليكم

اول مره ادخل مدونتك وان شاء الله هكون متابعه

رأيى الشخصى

هو قالك من الاول وانتى وافقتى صح؟

والمثل بيقول اللى اوله شرط اخره نور

وانتى وافقتى على الشرط فيه ايه بقى؟

مبدأزواج الرجل للمره الثانيه مش مأساه زى ما احنا مفكرين

بس فى الزمن ده واحده كفايه اوى وكمان حقوق الاولى مش بتبقى كامله يبقى يتزوج تانيه بعدها دى قله عقل

لو حقوقك كامله نصيحه (متخربيش بيتك)

وصدقينى نصيحتى دى مش من شويه انا شوفت كتيير كفايه خالتو اللى هيه خالتو ندمانه وبتقول انا اللى اتسرعت
ويا ريتى ما طلبت الطلاق

وانتى برده صلى صلاه استخاره وربنا يقدم اللى فيه الخير

تحياتى لكى اختى

sweet angel يقول...

بصي حضرتك انا طبعا لسه صغيره خالص على اني أدخل في كلام من ده

بس الموضوع كله انك لازم تحطي أدامك المشاكل واحده ورا واحده وكذلك الحلول

يعني مثلا أول مشكله بالنسبه لك انه هيتجوز .. دي حاجه متقدريش تحكمي فيها غصب عنه لانه هيعمل الي في دماغه

تبصي انتي بقى لحقوقك منها
هو عاوز يتجوز مفيش مشكله بس حقك القانوني انك تستقلي بشقه مع اولادك

واحلى حاجه انها بنت 17 سنه لو انتي وافقتي انها تيجي تعيش معاكي هو اسبوع وهتقول حقي برقبتي لانها عمرها ماهتحس انها صاحبه او ست البيت

ده لو اخدنا انه فعلا هيتجوز ويجيبها تعيش معاكي

وقبل كل ده لازم تشوفي شغل وترجعي تشتغلي تاني
وتصلحي علاقتك بأهلك بأي شكل علشان انتي متنسيش داخله على ولاده وهتحتاجيهم جنبك ماديا ومعنويا
يبقى دول لازم تضمنيهم فايدك

فكرة الطلاق مش هتفيدك كتير
ولا هنجوزها سيد سيدك ولا الكلام الفارغ ده اللهم الا انه هيكون ملزم بنفقه ممكن مع شغلك تعيشك واولادك في مستوى كويس
وحطي في الاعتبار انك لو فضلتي مستكينه كده ووحدانيه من غير أهلك مش هتعرفي تاخدي منه لاحق ولا باطل

يبقى انتي كده حددتي الاولويات الي اهمها انك تترمي في حضنك اهلك وهما يقفوله
يعني بتقولي ان ليكي اربع اخوات رجاله .. مش سامعين ليهم صوت يعني ؟؟؟
حاولي تروحيلهم لغايه مايحسو على دمهم دول لو وقفوا معاكي حاجات كتير هتتغير

وبعدها تبدأو تنظمو خطواتكم لو رجع عن الي في دماغه ده خير وبركه وبردو تشوفي شغل وتعملي علاقات مع ناس وتعرفي صديقات
لو مش رجع بردو تعيشي حياتك ويجيلك منه نفقه احسن من عنيه

وربنا يهديلك الحال

ستيتة حسب الله الحمش يقول...

مفروض انا كمان اقول رأيي
والحقيقة اني مبدأيا ادعوكي لتنظري للآراء التي تم طرحها بعين الفحص
الحمد لله زي ما قلت في اول بوست انا ربنا محاوطني بناس آراءها عقلانية أخر حلاوة
وعلشان كده معاهم لا خاب من استشار
طبعا انا بقرأ تعليق وجهة نظري حسيت انه وجهة نظري
لكن
انتي الوحيدة اللي تعرفي مقدرتك ايه
انتي اللي تعرفي الظروف المخفية اللي كام سطر ميجبهمش كلهم
للقصة مؤكد ابعاد محدش منا فاهمها
انتي بس اللي تعرفيها

ردي عليكي
اولا الراجل ده محبكيش
هو جه سن جوازه وكمان امكانياته سمحت
اخطب فلانة خطب فلانة
ورغم ان الطريقة التقليدية مش دايما بتؤدي للي حصل لك بس ده نصيبك
راجل بارد
لا حاسس بنعمة ست بترضيه
ولا مقدر انه واخد واحدة بالبراءة دي
ربنا يرزقه بواحدة من جمعية المرأة المتوحشة ان شاء الله تطلع على عينيه النجيلة الخضرا

ثانيا ايه يابنتي الحوسة اللي انتي حايساها لنفسك دي
على رأي وجهة نظري اخشوشني شوية
العرض سيستمر كده كده والشريط ماشي رضينا أم ابينا

عاوزاكي تنظري حولك شوية
انا اللي فهمته من رسالتك انك من قرى مصر
وفي قرى مصر فيه زواج تاني وانا شفته
طبعا مش في نفس الشقة بروح أهله لكن فيه زواج تاني
"مش يمكن ده اللي مخلي اخواتك بيبرقوا له بس مش بيهدوا بيتك على اساس لما عقلوها قالوا وماله ولا انها تاخد اللقب المفتخر وتشيل الطين لوحدها؟"
لو ان حولك قصص زي دي تبقى مش حاجة غريبة
حاجة مقرفة بس مش غريبة
لو نظرتي لها كده يمكن تهون عليكي شوية
عارفة انك كان نفسك في حلم كل بنت
بس ربنا بيكتب نصيب الخير لأبن آدم
وكمان بيديه على قدر تحمله
ربنا مش ها يفتنا في ديننا وبيحبنا

مع ظروفك اللي شرحتيها كلها بلاش تفكري في الطلاق لمجرد الإنتقام لكرامتك
الا لو فعلا حسيتي انك كارهه مش غيرانه
الكراهية لا تجوز معها عشرة
والكراهية علاماتها معروفة
لما تلاقيه نازل من البيت وتتمني ان ربنا ياخده بره ولما يرجع تلاقي نفسك حزينة انه رجع
هنا انتي رايحة في داهية دنيا وآخرة
وساعتها نبقى نتكلم في الطلاق

يتبع

ستيتة حسب الله الحمش يقول...

لكن لو على الغيرة - وهي مشروعة وكان الله في عونك وربنا يصبر قلبك على البلاء الشديد ده - فممكن تستحمليها
سهلة وخاصة مع حضضضت ناظر اللي متجوزاه
اعتبري واحدة ها تيجي تاخد نص الأوامر – في شقة تانية- ونص قرفه وخدمته
أنا اسفة اني بتكلم عليه كده بس اللي يفاصل في المصروف ويهجر بالشهور ولدود الخصام وجاحد للنعم الربانية في زوجة مطيعة وعزوة عيال ده يعني الواحد يقول فيه إيه؟
اعتبري نفسك ارملة
ربنا خده وانتي ها تاخدي من حبابي عينيه المعاش
واهم شيء ها تنامي بليل وولادك في حضنك
ولادك في حضنك دي نعمة رقم واحد
انك تفضلي في بيتك ومش محتاجة حد ولا تقيلة على حد دي نعمة رقم اتنين
انك متستتة وجاب كتير جاب قليل كده كده هو اللي ها يتعك في ولاده تربيةً وصرفاً
والحقيقة انك تكوني اب وام لتلاتة ده جنون وهو بيروق نفسوياته وبيبعجر معنوياته
نعمة رقم تلاتة
"انا رايي عكس بعض التعليقات متشتغليش مطلقا .. اللي زي ده ها يرمي عليكي حتى لو على ذمته علشان يثلث ويربع وكل واحدة تشيل بيتها وهو هارون البلطجي"
انتوا في قرية يعني لو اتجوز محدش ها يعيب عليه لكن لو مصرفش على ولاده فضيحته ها تبقى بجلاجل لأن السمعة والمظاهر مهمة وكل واحد بياخد باله منها

صعب قوي فوق خيالك البريء انك تروحي لأهلك
بولادك تقيلة ومزنوقة في مكان مش بتاعك
وعايشة تخدمي مراتت اخواتك وعيالهم بصفتك ها تشيلي بيت الأب
صدقيني شفتها في اكتر من ست
يجي الأخ ويدي ولادها قرشين واللي بعده واللي بعده شوية شوية تلاقي نفسها اسيرة نعمتهم ومتقدرش تزعلهم حتى لو ها تطق
ومحدش النهاردة بيربي ولاد حد تاني علشان ها تتجوزي بتلاتة
ومن غير ولادك اصبح قلبك فارغا من الحزن .. انسي حدوتة انهم يخدوكي من غير ولادك دي اساسا .. متحطهاش في عقلك ولا تفهمي حد انها احتمال واحد في المية

يتبع

ستيتة حسب الله الحمش يقول...

جمدي نفسك شوية لأن الأخ الفاضل بيعاملك على انك تلميذه في مدرسة سموه
عرفيه ان الطفلة البريئة الصغيرة ها تطلع تلاتة لوغاريتم اهله وان العملية بتاعة شكوى وبكوة خلصت والصدمة راحت والأمل مش مفترض واننا داخلين على مرحلة قرف القانون
صدقيني اللي زي ده بيكون ميت على القرش "والدليل انه بيديكي مصروف كأنه بيعامل طفلة مش زوجته" ولما يستشير مستشارين الهم والغم ويعرف انه داخل على بلوة ها يفكر لأول مرة ويضطر يطلع عقله من الصيانة

طلب واحد الله يكرمك
في الوقت اللي بتبطلي فيه عياط
وبتلوحي بإجراءات صارمة
بلاش عند
لا عند على الإطلاق
هو التوازن بين القوة والغلبنة والمسكنة
مكر النساء هنا مطلب اساسي وياريت تاخديه حقن في العضل من متخصصة من اهلك
علشان ما تقلبش معاه بعند وبس
سيبي له قيراط يرجع منه بكرامة
وكأنه راجع علشان العيل اللي ها يتولد مثلا
علشان اي حاجة غير انه خضع
وربنا يسخره لك في الخير يارب ودعائي لك بكل خير

ملحوظة أخيرة في التعليق الطويل ده
انتي ذكرتي انه زميل اخ من اخواتك
ميجراش حاجة ان ده الاخ اللي يتدخل لحل المشكلة لوحده يمكن يقدر
علشان ميحصلش غلط في ذات سموه ويكبر الموضوع
لما تطلبي من واحد ها يكون قرار سهل ولما تطلبي من عيلة كل واحد بيرمي على التاني ويهرب
قدرنا في الزمن ده ان الستات بميت راجل
ده قدر والله
يمكن يعمل له خاطر
يمكن برضه لو مفيش فايدة يكون همزة الوصل الطيبة اللي تجيب حقوقك لحد ما يجيبها لك رب العالمين
تحياتي وربنا يرشدك للصواب

هى الحياة كدا يقول...

ربنا يعينك على الابتلاء دا وتجتازى المحنة بقلب جامد صابر للنهاية وانتى اولادك فى حضنك
انا رأيي انك تحددى الاول مشاعرك وقراراتك انتى عايزة تكملى معاه لشخصة زى ما هو كدا رغم العيوب اللى انتى شيفاها فيه ولا لا
بعيد تمام عن حكاية الجواز التانى دى طلع قرارك انك هتعيشى معاه ومستحملاه بس اللى فرق حكاية الجواز التانى كدا يبقى مفيش قدمنا غير اننا نقولك استحملى عشان حياتك متتهدش بما فى ذلك شخصيتك واطفالك ومستقبلك ومستقبلهم
تعالى على نفسك وافرضى قوانينك
يعنى خليكى شرسة فى المطالبة بحقك فى الاستقرار فى بيتك لوحدك و مع اولادك وهو يصرف عليكم دا الاساسيات وحضرتك تقدرى تزودى عليها حسب درايتك الاكثر مننا طبعا بجوانب مشكلتك
وارمى الكرة فى ملعبة زى ما بيقولوا
هو جيالة مصريف زيادة كدا كدا في بيتة الاساسى ومسؤليات زيادة هو عايز يعمل فيها جدع ويتحمل جوازة ومسؤليات تانية فوق مسؤلياتة سبية تعالى على نفسك واستحملى الغيرة مكسبها على قد صعوبتها احسن ما تصعب عليكى نفسك وياتى ما لا يحمد عقباه اعتقد دكتورة ستيتة شرحت الوضع هيكون ازاى ساعتها

اسف جدا وانا بقولك الكلام دا وعارف انه بيهد فى روحك ومشاعرك كأنسانه بس بيحافظ على بيتك واولادك بس دا وقت عقلانية وانتى مش قادرة تهدى عشان تفكرى عشان كدا لازم نقول الكلام دا ونفتح عينك على الموضوع من كل جوانبة وبكذا رأي بس نصيحة اقرى وفكرى فى التعليقات والاراء بهدوء وشوفى اللى ينسبك واعملية متخديش برأي زى ما هو كدا مش بس عشان انتى ادرى حد بجوانب المشكلة عشان محدش من اللى بيعلقوا عاش جو المشكلة زيك وحس بيها زيك وهيعيش معاها على الاقل الفترة اللى جية دى

ربنا يصلح الحال

فاتيما يقول...

ستوتة

مبروك ع المدونة
ولو انها توجع القلب
انا لسه جاية من عند ندى الياسمين و متقلب عليا المواجع والحكاية هنا كملتها

انا معاكى ف كل حرف قولتيه
متطلبش الطلاق
محدش هيتحملها بولادها ابدا
وكمان لقب مطلقة وتوابعه هيا مش قدها لإن واضح انها رقيقة وقلب خساية على اسم مدونتك بالمللى

كمان بلاش نصايح اللجوء للقانون والمحاكم دى يا ناس
اللى داخلين المحكمة من الطرفين خسران
وهيا تحديدا هتتبهدل بهدلة فوق الوصف
لا هيكون فيه فلوس لكدا
ولا ناس تسندها لكدا
ولا حتى بعد ما تاخد احكام هتعرف تعمل بيها حاجة
دا طبعا بعد ميت سنة مثلاً


قعادها ف بيتها اقل الحلول ضرراً
انا عارفة انه صعب جدا تتحمل ضرة
بس ربنا يفرغ عليه صبره و ويسندها
مش يمكن الزوجة الجديدة هيا اللى تقول امشى من هنا ؟!!

انا عارفة ان الرقص على نغمات اعدائك شىء صعب
بس مين قال ان رحيلها عن حياتها الزوجية مش كدا برضو

الخروج من الأرض ..معناه الطرد
وخروجها من بيتها معناها غالبا انها مش هتقدر ترجعله تانى بينما هيا اولى الناس بيه

انا رآيى تفضل وتستنى
وتعمل زى انتى ما قولتى
تحضن ولادها ...لأن اخدنهم من حضنها اذى ما بعده أذى
وانا مع الحب الجميل ..انها لازم دلوقتى تفكر كأم ...قبل ما تفكر كست
ومع سويت انجل ان الطلاق مش هيفيد
مش مع الجماعة اللى بيقولوا تنفصل وتتطلق ..لأن دا مش هيغير من الوضع بل بالعكس هيدمره زيادة وميخليش فيه اى فرصة للرجوع تانى


انا عارفة انى كدا بظلمها
لما اقولها اصبرى
بس الراجل اللى م النوعية دى عاوز معجزة عشان ينصلح حاله
او هيا اللى عاوزة معجزة عشان تخلص منه

حالتى يمكن تكون نموذج نوعا ما
انا خلصت بأعجوبة ..بس دفعت تمن غالى وما زلت بدفع
الحمدلله ربنا يخليلى اهلى كانوا دعم وسند لكن هيا للأسف وضعها صعب وربنا يهديلها الاحوال

مبقاش فاضل غير ترمى توكالها على ربنا و تلتزم بيتها وتخلى بالها من ولادها و تحاول تبقى على البرج الفاضل ف نافوخا ثابتا ميطرش

ربنا يبعتله اللى تربيه وتعلمه ان الإفترا وحش ..على رآيك
وربنا بيورينا آياته
بس احنا نصبر ونحتسب


مبروك ع المدونة
وربنا يجعلك عونا لكل حد يا ستوتة
انا كمان كنت بحب ضياء الدين بيبرس بشكل خراااافى وربنا يعلى مقامه ف جنات النعيم يا رب


بوسات وحضونات

ودعوات لصاحب الحكاية
ربنا يصلحلها الاحوال

وجهة نظري يقول...

ستيتة، انتي جبتي من الأخر زي مابيقلوا، د بالظبط شرح إلي أنا كنت نفسي أقوله .... وانتي جبتي كل المفيد.

فتاه من الصعيد يقول...

ماقدرش ارد .... معنديش كلام يتقال

بس طبعا البيئه المقفوله دي بتخلق قله الحيله للاسف

ربنا معاها واتمنى الكل يدخل ينصحها

تحياتي

هراء لا داعى له ..... يقول...

قد أكون شخص هندى بس إسمحولى أسأل


و فيها إيه يعنى لما يعيشوا مع بعض فى شقة واحدة ؟؟؟؟؟؟


هى مش دى إنسانة و دى إنسانة ؟

دى أنثى و دى أنثى ؟

دى مسلمة و دى مسلمة ؟

دى مصرية و دى مصرية ؟

لأو كمان من بلد واحدة


و المصادفة العجيبة إنهم هيبقوا زوجات رجل واحد


يعنى فى نقاط تلاقى و تواصل كتيييرة جدا ما بينهم ليه حولناها لنقاط فرقة و قطع و حدود عسكرية و سلوك شائكة ؟؟؟


لو جوزك إختار إنسانة كويسة و طيبة و روحها سمحة

هتبقى أقربلك من إخواتك و منه هو شخصيا


و لو مكانتش كدا أو كانت الحياة معاها لا تطاق ..... هو إللى يهدورلها على شقة تانية من نفسه علشان مش هيطيق البيت من الجو إللى فيه و إنتى أم العيال و مهما كان هتبقى مكانتك و مقامك أغلى منها لو جات لحظة مقارنة فاصلة بعد جوازه

شيرين سامي يقول...

@هراء لا داعى له : أنا مش عايزه أرد على كلامك و همسك نفسي على الآخر بس كفايه أقولك ان كما تدين تدان و أكيد لك أخت أو بنت متزعلش بقى لما تشوف المر و الذل و القهر على أيد رجل طبيعي من وجهة نظرك...و ساعتها ابقى قولها الكلام ده

ستيتة حسب الله الحمش يقول...

الحقيقة يا هراء ياخويا انا لا أحب كثرة الجدل
وعليه ها اقول كلمتين فقط لاغير

اخوك ابن امك وابوك بتكون قرفان من عشرته لو طالت شوية
بتتمنى تستقل بقى ببيت وحياة على مزاجك
لا عاوز اب يقول لك ترجع امتى
ولا ام تخنقك باهتمام كأنك كي جي وان
ولا اخ يشارك شراباتك واشياء اخرى

حلم الإستقلالية بتاعك ده مش خاص بيك كونك راجل
لأ والله الأنثى بني أدم
أه صدقني انا عارفة ان صعب تتخيلها بس والله والله والله بالدراسات النفسية والمجهرية والفسيولوجية اثبتوا انها بني أدم
وبتحب الإستقلال ومعندهاش هسهس وبتخاف تنام في الضلمة علشان تعمل قطيع زي القرود وتعيش وسطه مع الذكر الحامي

الأنثى انسان
يحتاج الإستقلالية
يتفهم معنى كلمة خصوصية
بتغير على وليفها

بني آدم يعني
بس كده وخلاص بلا اي جدال
وزي ما انا معرفش احس احساسك لما تشوف انثى جميلة في الشارع
بيكون عندي مجرد تصور نتيجة لشرحك
انت كمان مكنتش ست في يوم من الأيام علشان تحس باحساس الست
ويارب يوجد لك دي اللي ها تلاقي نفسها انثى في قطيع ومستعدة تقسمك بينها وبين عدد انت اللي تحدده

تحياتي