الاثنين، 20 ديسمبر، 2010

إيه رأيكم في الصيني؟


نبدأ الحكاية فروم طقطق تو سلامو عليكو
من ساعة ما أتولدت أو يمكن قبلها بشوية سنين ييجوا قرنين من الزمان
 وأخواتى وأبويا وأمى عايزينى أدخل كلية طب

 كل ده لأن مفيش حد فى العيلة كلها فى كلية قمة وأعلى واحد فى العيلة
 كلها كان أخويا الكبير وكان تربية رياضة عام
 ده طبعا قبل ما أتنيل أنا وأخد شرف أه قصدى قرف الرقم القياسى ده

جه واحد  لما كنت فى ثانوى - وكان زميلى ساعتها طبعا - قاللى على فكرة أنت مش
 هتعرف تعمل حاجة فى طب لانك بتخاف تشوف دم فراخ فما بالك بقى بدم البنى
 أدمين ؟ 
من ساعتها قررت أن أدخل علمى رياضة علشان هندسة 
وطبعا هما فى
 البيت مقالوش حاجة لان هندسة برضه كلية قمة 
(نفسى أمسك اللى طلع تسمية كليات قمة وكليات قاع وانفخه) :))

عموما كل ده وأنا مكنتش عارف أنا بحب أيه علشان أدخله لانى كنت عامل زى
 المركبة العايمة على المية بهزة منهم أروح يمين وبهزة تانية أروح شمال 
(يعنى مكانتش ليا أية أراء أو أية شخصية)
 وبعدين التنسيق طبعا بتاع 2009 مودانيش هندسة 
ودانى على حاسبات 
وبعد طلب تقليل الاغتراب على النت دخلت حاسبات أسيوط بلدى

 أنا السنة دى يعتبر شغال شوية عن السنة اللى فاتت لانى دلوقتى ليا سنتين
 فى الكلية وهما الاتنين للأسف فى سنة أولى
 لما لقيت السنة اللى فاتت الدنيا باظت معايا أترددت كتير هل أقسم السنة
 لنصين ولا أحول لكلية تانية ولا أيه بالظبط ؟
 المهم من كتر ترددى رحت نزلت فى عشر مواد من أصل تلاتاشر .

 ملحوظة بقى علشان نحط النقط على الحروف : أنا مش غبى ولا حاجة بل ودى
شهادة أعتز بيها جدا : أستاذ العربى فى الثانوية العامة دايما كان بيقول
 الواد ...... أذكى واد فى الفصل ، بس طبعا عمره ما قال الواد ....... أشطر واد
فى الفصل ، لانى أتمتع بقدر جيد من الذكاء ، لكن الحاجات اللى مبحبهاش
 مبذاكرهاش فضلا عن أنى مبعرفش أذاكر فى أغلب الأحيان الا العربى
والفرنساوى والانجليزى ( اللغات يعنى ) . 
بس لو دخلت حاجة بحبها كنت هذاكر
 وضوافر رجلى فوق شعر راسى

نرجع لمرجوعنا :))
بعد لما نزلت فى الكم الرهيب ده من المواد قلتلهم فى البيت عاوز أحول
لآثار لألسن لآى كلية تانية انا حاسس أنى حاببها بس هما مرضيوش وأنا برضه
طنشت للموضوع كله لانى مكنتش لغاية دلوقتى حابب حاجة خالص لانهم فى البيت
منموش فيا حتة أنى أحب حاجة ، هما كل اللى عايزينه كلية قمة وعشر تلاف
جنيه أول كل شهر  .

طبعا استهزأوا بيا وغضبوا زى ما كتبت فى القصة اللى حضرتك قريتيها من شوية .
وبعدين جيت كملت السنة دى ، ماشى أنا حاولت أذاكر علشان أطلع من السنة دى
وماتفصلش من التعليم الحكومى ، والى حد ما ماشى مع الكلية وبطلع الاول فى
شوية حاجات كمان .

بس أنا قررت السنة دى أنى هعمل حاجة أقررها أنا بنفسى وألقى باعتراضاتهم
فى البيت عرض الحائط ، 
قررت أن أحول ألسن وبعد حوالى شهرين من البحث على
الانترنت ومع الاصدقاء لقيت أن ألسن مش قابلانى رغم أن جايب مجموعها اللى
بيدخلوها بيه 
بس من أدبى أما المجموع اللى بيدخلوها بيه من علمى فأكتر من
مجموعى بحوالى عشر درجات وأنا فى علمى بالطبع ، 
يعنى رحت فى الكازوزة .
صدمت فى الأول وبعدين قلت أكمل فى الكلية وخلاص ، 
وبعدين قلت لأ استحالة أكمل فى حاجة أنا مش حاببها أصلا ، 
ولانى كنت عاوز أدخل ألسن علشان أدخل
 قسم صينى اللى فيها ،
قررت أنى أدخل أى كلية أداب ويكون فيها قسم صينى ،
 صحيح مش هتكون زى ألسن طبعا ، 
لكن اللى متأكد منه أنى حابب أدخل أداب صينى من كل قلبى ، 
واللى متأكد منه برضه أنى هنجز فيها طالما حاببها ومش
بعيد أبقى من أشهر دكاترة الصينى أو من أشهر المترجمين من والى الصينى
للغة العربية خاصة وأنى فى اللغة العربية تمام قوى .

المهم أيه رأى حضرتك فى الحدوتة دى كلها
عايز رأى حضرتك ورأى المتابعين برضه
عايز نصايح تفيدنى بعد كده
أعمل أيه بالظبط ؟
 فاصل اعلانى : -
 أبعت مشكلتك والدكتورة ستيتة هتحلها
 الدكتورة ستيتـــــــــــة
 الخيط الابيض من الاسود لازم هيبان
 والقلب الابيض مش اسود هو الكسبان
وأنا فى الأول أو فى الآخر انسان :))
منتظر الرد ضرووووووووووورى
 والسلام عليكم

هناك 22 تعليقًا:

Ramy يقول...

شوف يا سيدى انت احلى حاجة فى الموضوع كله

ثقتك فى نفسك مش غرور

و دة شيىء فرحنى جداً و اللى انت عملته صح لأن ممكن مع الكُليه لو فى فى سفارة الصين زى روسيا كدة
مركزتعليم للغة الصينية ممكن تلتحق فيه

و انت لسه صُغير ألحق و متترددش

أوعى تضيع اى فرصة ليك دلوقت لأن بعدين هتندم

بس ليه ملحوظة صُغيرة هى الألسن مش كُليات قمة و لا ايه

ليه مخلتهاش هدف من الأول و كان برضه هتبسط أهلك

على العموم

ربنا يوفقك و انا موافقك (:

MR.PRESIDENT يقول...

خليك في كليتك " حاسبات "
لها مستقبل حتي لو مش حاببها .
وادرس صيني علي جنب .. تبقي مسكت العصاية من النص .

Ramy يقول...

على جنب بقى

كان فى دكتور عندنا فى الكلية

بيقول مفيش حاجة أسمها كُليات قمة الكُلية اللى تحقق فيها ذاتك هى دى كُلية القمة

ديما يقول...

انا رأيي خليك فى كليتك متخسرهاش
هى ليها مستقبل كويس وابقى ادرس لغات صينى فرنساوى اسبانى زى ما تحب بس بعد ما تخلص كليتك وتضمنلك طريق فى الحياة مش هيميل بيك واهى حاجة مضمونة
انت بس ناقصك انك تفكر بعقلانية وتأخد الحكاية جد شوية مش بحب ومبحبش ورأيي اهلي اية ورأي انا اية ؟
لالا فكر اية مجال الشغل اللى تحب تشتغلة
وهل تقدر تدرس حاجتين مع بعض ولا هو لازم وضرورى تفاضل حاجة عن حاجة
ربنا يوفقك

لورنس العرب يقول...

لا يوجد شيء في الدنيا اسمه كليات قمه وكليات قاع
المهم بعد ان تتخرج من الكليه ماذا ستفعل وتصنع

شيرين سامي يقول...

أنا رأيي انك تكمل في كليتك مش عشان هيه كلية قمه لكن بصراحه موضوع الصيني ده شكله مالوش مستقبل
ممكن تبقى تدرس الماده دي لوحدها بعد كده و أهو لما تبقى مهندس معاه لغه صيني ممكن تفتحلك مجالات كتير لكن صيني بس...مش حاجه واو يعني
ركز في دراستك و متخليش الوساوس تاخدك أنا أخويا في طب شال سنه أولى بردو و دلوقتي في السنين النهائيه بيجيب تقديرات عاليه
بالتوفيق ان شاء الله

واحد من الناس يقول...

اولا انسى قصة كلية قمة وكلية قاع القمة هي احساسك بذاتك واهمية فعلك بغض النظر عن نظرة مجتمعات العالم الثالث والخمسين بعد المائة قبل الميلاد(انا دكتور بشري قبل ما حد يقول ده قصر ديل )ثانيا اي لغة يمكن تعلمها كهواية واجادتها بمجموعة دورات في حالة اذا كنت فعلا بتحب الصيني والمسألة مش انك بتحاول تعاند الناس اللي انت متخيل ان هم السبب مش سوء اختياراتك اللي حكم عليك بالوضع ده .سقطت سنة مش نهاية الدنيا . والمستقبل في كليتك الحالية من الناحية الواقعية افضل مليون مرة من المستقبل الهلامي لاداب صيني وبالتوفيق باذن الله

Mohamed يقول...

لو دخلت محاضرة في أحد الجامعات الامريكيه أو الاوربيه , حتجد متوسط الاعمار من 18 لحد 60 سنه ,ولو حالفك الحظ والقيت نظره علي الاحصائيات للمتقدمين لكليات الطب و الهندسه في الغرب حتجد واحد عنده 40 سنه ومعاه دكتورة في الموسيقي ولا الزرعه
واشتغل عمر كبير في مهنته , بس زهق وحب يغير وغير بكل بساطة, وهو
عنده مسؤليات

*الغرب عندهم لفظ
career change
ابدا مش بيعملوا ولا بيدرسوا الا الي بيحبوه
عادي جدا تلاقي واحد في كلية طب , سابها ودرس موسيقي, لو في مصر كانت العيال زفته
واحد زي بيل جيتس, كان في اعظم جامعة في العالم بس مش حابب الرياضيات,مجال دراسته, تركها واصبح بيل جيتس, اغني اغنياء الارض , كذلك ستيف جوبس صاحب شره ابل

***الا قصدي من الامثله الا فاتت, انت مش غلط, ده الا مفروض يحصل أن كل شخص يدرس الشيء الي عارف انه حيبدع فيه وحنجح فيه, ماكانش فيه العدد الكبير ده من خريجين كليات القمه

*هل الفكر الغربي ده ممكن يطبق في دولنا العربيه, و في حالتك ؟؟,

(يتبع)

Mohamed يقول...

اقولك بالطبع لا ,مصر وبلادنا العربيه بلاد سهادات, كمان كام سنه لما تحب تتجوز وتتقدم للبنت الي بتحبها لو مهندس غير خريج كلية أدب,لو حتي اتمسكت في كمين و كنت مهندس ,دكتور,غير كلية السن ولا أدب,ده طريقة تفيكرنا و أعرف ناس تعبت كتير عشان حبة تطبق النظام الغربي في دولنا العربيه
ف بالملء فمي انصحك كمل في الهندسه, حبها واستحمل الكام سنه دول , اللغات مش سيء لازم تدخله كلية,كمل يا طيب

لو بتتكلم علي المستقبل انت عارف أن مجال
IT (Information technology)
اكثر مهنه نموا في العالم, واكثر مهنه مطلوبه في العالم حاليا!!
عارف أن متوسط الدخل لاصدقانا في الدول الغربيه لو حبيت تسافر بعد كده حوالي 120 ألف سنويا
و المجال كل يوم فيه جديد, الصبر واركز و استحمل الكم سنه دول عشان ترتاح بقيت عمرك
ربنا يكتبلكم جميعا الخير والسعادة و الرزق

خواطر شابة يقول...

انت موجود في فترة عمرية يغلب فيها على قراراتنا التخبط انت لو وقفت وقفة صريحة مع نفسك ستجدك للان لا تعرف ما تريده بالظبط اختياراتك ليست نهائية ولا حتمية انت تحتاج الى ان تعيد حساباتك جيدا وان تشاور ذوي التجربة فيما ستختاره لانه ما خاب من استشار وبعدها تتخذ قرارك دون ضغوط قرار يكون نابع من ذاتك دون مؤثرات تكون ايضا مسؤولا عنه لانه خيارك انت لاتحمل عواقبه ايا كانت لغيرك
تمنياتي لك بالتوفيق

فتاه من الصعيد يقول...

ركز في كليتك الاول ..... بعدين نشوف موضوع الصين ده :)

عارفه اني بتكلم زي والدك ووالدتك .... بس انا بنصحك باللي شايفاه

اللغات سهل تدرسها في اي مركز ..

مين قالك اصلا انك لو دخلت اداب صيني هتتعلم صح؟؟

كان غيرك اتعلم .... انت بعد ما تتخرج دور على مركز محترم خد فيه كورسات

تحياتي

جايدا العزيزي يقول...

انا رائ انك تكمل كليتك

لان ليها مستقبل

ومافيش ابدا مانع تدرس اى لغه انت عايزها

لان ده مستقبلك

امسك العصايه من النص

تحياتى

ماجد القاضي يقول...

السلام عليكم

بصراحة كنت لن أكتب رأيي وأكتفي بأن من سبقوني طرحوه؛ لكن تذكرت كلمة دكتورة ستيتة التي فحواها أنه كلما زاد عدد الآراء كانت الرؤية أوضح والرأي المبني عليها أقرب إلى الصواب بإذن الله..

أرى أخي الكريم ألا تترك كليتك الحالية (بما أنك كما فهمت من قراءتك أنه يمكنك أن تتفاعل معها) بينما يمكنك اكتساب اللغة دون الاحتياج إلى الدراسة النظامية..
ولي بالفعل قريب بعد أن أنهى دراسته الجامعية، قرر فجأة أن يتعلم الهولندية (مش عارف اشمعنا الهولندية!!!) المهم أنه اكتسبها في بضع شهور من خلال كورسات مكثفة، وانطلق يعمل بها مترجما في البازارات السياحية..

بقي أن أطلب منك طلبا ليس جديدا (من باب التأكيد).. لا تجعل فكرة أن (أهلي فعلوا معي كذا ولم يفعلوا كذا) تسيطر عليك كثيرا.. فلو حاسبنا أهالينا على كل ما فعلوه معنا لن تستقيم لنا حياة.. هم فعلوا ما يستطيعون وفق فهمهم وثقافتهم وقدراتهم.. الآن أن واع تماما للعالم من حولك.. فهيا انطلق..

طبعا لا تنسى الاستخارة..

ربنا ييسر لك أمرك ويبصرك بما فيه الخير...

-------------
ممكن كلمة أخيرة؟

اتخذ من القرارات ما أنت قادر على تحمل تبعاته.

تحياتي أخي الكريم.

ستيتة حسب الله الحمش يقول...

صديقي العزيز

رأيي مبني على الإحصاءات العلمية
وهو لا يختلف مطلقا عن من سبقني

انت ها تقضي كده كده سنتين في حاسبات
ولازم تنجح بعون ربنا السنة دي
معندكش حل في مسئلة النجاح
وها تسيب سنة اولى اللي خلصتها فعلا
وباقي لك تلاتة
وتروح تاخد اربعة تانين
تبقى ست سنوات
زائد الجيش لأن لك اخ ربنا يخليه

انت اللي تحكم هل اربع سنوات في دراسة لغة نظرية وسهل تاخدها في مركز ثقافي تستاهل سبع سنوات ونصف من العمر؟

ده هام
تاني هام يا فندم انت فعلا في كلية ما شاء الله حلوة جدا
المستقبل في مصر ليها
سيبك من قمة ومنحدر دي
اللي في مكان وناجح فيه هو ده القمة
وغير كده عقد وكلاكيكعو

اعرف بنت بتشتغل من بعد ما خلصت تانية حاسبات وهي لسه طالبة وبمبلغ حلو جدا

ولو قلنا قصة ألسن حسب ما بسمع من الناس إنها مش تعليم اللغة العجبة
كلهم قالوا بدون كورسات مش ها تتكلم
لأن ألسن هي نحو اللغات
والآداب هي تاريخ اللغة وحضارتها

يعني تقدر تعمل كل اللي نفسك فيه زائد الصح اللي ربنا فعليا كتبه لك

كل ده في حالة واحدة بس
لو كان تكملة الكلية دي مش ها تأثر على نفسيتك تأثير غير مردود
وانت جدع وتقدر تعرف إيه اللي تقدر عليه

ها يبقى من الجميل جدا انك تقدر تكمل اللي اهلك بيحلموا وخاصة إنك اصبحت ماشي فيه
وكمان تعمل اللي بتحبه
والإتنين مش متعارضين خالص

ربنا معاك وتحياتي لك
وشكرا على كلامك الجميل
كم اسعدني :)

الكاتب محب روفائيل يقول...

شكرا يا جماعة خالص على ردودكم واراءكم اللى بجد خليتنى أشوف الموضوع بنظرة موضوعية متكاملة ، وطبعا زادت لى أراء وحاجات كتير جدا.
رغم أن الاغلبية الساحقة بترشح أنى أقعد فى الكلية ، الا أنى مش عارف برضه هعمل أيه ، لانى قبل ما أكتب الموضوع كنت خلاص قررت أن أحول لآداب السنة الجاية ، لكن الردود دى خليتنى أفكر أكتر فى الموضوع
عموما لسة قاعد بقية التيرم الاول والتيرم التانى كله عقبال ما يجى تنفيذ القرار ، أما القرار المؤقت فهو طبعا يبقى الحال كما هو عليه :))
أنا بشكركم كلكم وخاصة الدكتورة ستيتة على قيامها بدور الوسيط الفعال والمشارك أيضا .
زى ما قلت قبل كده كان فى دماغى أحول لآداب فعلا لكن الاراء الجميلة دى عرفت منها أن لو قعدت فى كليتى مش هموت مثلا دى أول حاجة
أما تانى حاجة بقى فهى اكراما لوالديا
اما التالتة والأخيرة أن امسك العصاي من النص لما أذاكر حاسبات وأخذ كورسات صينى . فعلا كده العصاية الى حد ما اتمسكت من النص
لكن برضه لسة قدامى كتير وأنا صدقونى من بداية السنة وأنا عمال أفكر فى الموضوع بس طبعا على نار هادية لان الوقت كان ومازال قدامى كتير
تجربة المدونة تجربة جديرة وعظيمة
أنا منتظر أيضا تعليقاتكم وأرائكم ونصائحكم برضه الى انتهاء التيرم التانى وما بعده أيضا . يعنى معاكم كتيييير عشان تقولوا أراءكم
مع تحياتى القلبية
محب روفائيل حكيم
صاحب المشكلة طبعا :))

Haytham Alsayes يقول...

بص يااستاذ مش عارف فيه اداب صيني ديني ولا لا بس اظن مفيش علي الاقل في الكليات اللي اعرفها لو في فعلا خير ادخل لو حابب واعمل اللي تحبه طبعا حتي لو ميت واحد قالك انوا وحش لا اعمل اللي انت عاوزه وحابه وصلي طبعا استخارة بعد كل دة

بس علي فكرة لو انت غاوى لغات اوى في قسم جديد في الاداب اسمه قسم لغات شرقية بصراحة جميل جدا بفكر ادرس فيه بعدين في لغات زى التركي والعبرى والاوردى بتاعة الهند وباكستان وعلي فكرة اللغات دى عاوزين فيها كتير في سوق العمل بس اللي اعرفه ان القسم دة موجود في جامعة اسكندرية مش عارف موجود في جامعات تانية ولا لا
وعلي فكرة دة لسة مخرجش دفع منه اول دفعة هتكون السنة دى تقريبا فشوف برده لو انت حابب لغات دى لغات سهلة وفي فرصة عمل كويسة جدا

ربنا يوفقك


تحياتي

غير معرف يقول...

قبل ما أكمل قراية التعليقات مستر بريزدنت قالك رأيى بالضبط

شوف أنا دكتورة فى كلية اعلام على عكسك تماما كنت حابة أدخل مجال الاعلام من أولى ثانوى

بص يابنى انت تكمل فى الحاسبات لأنها من العلوم اللى مش هتقدر تحصلها خارج الكلية لكن اللغات بشكل عام تقدر تزود معلوماتك فيها بسهولة.. فكرة انك تكون أعظم مترجم أو دكتور فى الصينى سهلة جدا بعد التخرج ممكن تكمل دراسات عليا فى اللى انت عاوزه من خلال الدبلومة وهكذا واحنا عندنا فى الكلية دارسين كتير جدا من خارج الكلية فى الدراسات العليا وفى ناس بتدرس لمجرد انه مجال بيحبوه وعاوزين يدرسوا فيه

خليك فى الحاسبات أى نعم مش هتجيب تقدير بس هتاخد شهادة مستقبلها كويس واحنا فى الكلية حاليا شغالين على تكنولوجيا الإعلام مش الاعلام التقليدى اذن المستقبل لثورة المعلومات

زود معلوماتك فى الحاسبات وخد شهادة واردس الصينى أو اليابانى أو الفرنساوى أو أى لغة كانت وانت هتبقى كويس فيها
ودراسة الكمبيوتر مش صعبة بالعكس دى لذيذة جدا

ربنا يعينك ويوفقك .. وتنفع فى قسم الدعاية والاعلان عندنا
:)
ربنا معاك

غير معرف يقول...

بالنسبة للأخ هيثم السايس

قسم لغات شرقية موجود فى أغلب الجامعات وبيدرسوا فيه العبرى كمان زيادة عليك
وفى دفعات اتخرجت لأن أنا زمايلى من 10 سنين كانوا فيه واتخرجوا

زيادة الدراسة على شهادتك حب للدراسة مش علشان تلاقى شغل
احنا بننصح الواد يكمل فى الكلية علشان مستقبله كشاب عنده التزامات بعدين
ودا مش خضوع للأهل على فكرة أحيانا الأهل بيكونوا عارفين أكتر مننا ومش بندرك ده إلا بعدين لما نتخرج مثلا

غير معرف يقول...

بالنسبة للأخ هيثم السايس

قسم لغات شرقية موجود فى أغلب الجامعات وبيدرسوا فيه العبرى كمان زيادة عليك
وفى دفعات اتخرجت لأن أنا زمايلى من 10 سنين كانوا فيه واتخرجوا

زيادة الدراسة على شهادتك حب للدراسة مش علشان تلاقى شغل
احنا بننصح الواد يكمل فى الكلية علشان مستقبله كشاب عنده التزامات بعدين
ودا مش خضوع للأهل على فكرة أحيانا الأهل بيكونوا عارفين أكتر مننا ومش بندرك ده إلا بعدين لما نتخرج مثلا

halaS demahoM يقول...

بسم الله
بص يا سيدي
انا خريج حاسبات 2010 لسه فريش والحمد لله لسه فاكر الكليه علي ايه بالظبط
ولو حابب تقتنع بالكليه
mohaalp_salah@yahoo.com
ده ايميلي اللي لو حابب حد يثبتك بفضل الله ممكن تضيفه وتسيب الباقي علي ربنا ثم العبد لله
ولو مش هتضيفه يبقي تسمع البؤين دول
يمكن مشكلتك دي كل الناس اللي هنا مرت بيها تقريبا
كلنا كنا بنعاني من محدش عارف هو عاوز يبق ايه
انا شخصيا لاقيت جايلي حاسبات الزقازيق وانا كنت حابب ادخل تجاره بس عادي يعني
الدني مبتقفش علي حاجه
علي كلام معاليك
انت عاوز تحول لكلية اداب
وانت مقتنع انك هتحبها
اولا انت متعرفش ظروف الكليه ايه عشان تقول كده
ممكن ربنا يفرض عليك دكتور رخم يكرهك في الدنيا باللي فيها
او ممكن تقع وسط ناس تعقدك او تفسدك تماما وتخليك تنسي انت حولت كلية اداب ليه
محدش يعرف الظروف ايه
يعني متحاولش تفكر تقنع نفسك انك لو اتحطيت هنا هتنجز
كل البشر عندهم سياسة لو
يقولك لو انا كنت كذا كنت هعمل كذا وكذا
اللي بينجز يا بابا بينجز تحت ضغط بصرف النظر عن ايه الضغط ده
في السي في بتاعك ان شاء الله هتكتب
can work under preasure
يعني تقدر تشتغل تحت ضغط ايا كان الضغط ده
انت حاول تنجز في الكليه اللي انت فيها
وثق تمام الثقه انك لما تخلص كليه مش هتبقي عاوز تسيبها
وهتحب علمها وهتشكر ربنا ان حطك في المكان ده رغم انفك
ربك مبيحطش حد في مكان او في اي حاجه في الدنيا غير وهو عارف ان ده انسب مكان ليه
لو اضطلعتم علي الغيب لاخترتم الواقع
توكل علي الله

halaS demahoM يقول...

في احد اللي علقوا فوق قال ان مجالك هيبقي
IT
وده مش صح بالمره
انت هتبقي حاجه تانيه غير كده خالص
حاجه هتبقي فخور انك عندك العلم اللي بيشتغلها
ماشي يا سيدي
توكل علي الله
وحاول تقعد مع اي حد في الكليه يكون في سنه رابعه وقوله الكليه حلوه ولا وحشه
وقوله مجالها ايه
وابقي افتكرني بالخير لما تبقي مبرمج قد الدنيا ان شاء الله
وياسيدي اتعلم صيني براحتك مع نفسك
محدش هيقولك تلت التلاته كااام
عارف ليه؟؟؟؟





عشان تلت التلاته واحد
والناس كلها عارفه
سلامي

الكاتب محب روفائيل يقول...

الى كل من قدم رأيه وسيقدم

أراؤكم محل التقدير والفحص

والشكر للدكتورة ستيتة