الجمعة، 17 ديسمبر 2010

أجدبت أيامي ظلما


ما هذا الذي تصيغه لنا كأنك عشت مأساة حقيقية؟
وما كل هذا النواح عن الماكرة والخائنة
ثم تتحفنا برأيك في بنات آدم
كل النساء مش عارفة مالهم ولو مشيوا على الماء أو طاروا في السماء
وماذا يدعوهن ليفعلن هذا لإرضاء مثلك؟
ماهي مميزاتك الخطيرة التي تستدعي أنثى لإثبات حسن أخلاقها وورعها لمثلك؟

تريد أن تستمع لقصة حقيقية ومأساة حقيقية
هاهي قصتي
أنا في أواخر الخمسينات
جميلة جدا وبلا غرور أو تصنع تواضع .. أظنه أمر شبه معتاد لأصحاب الأصول التركية
ودليلي ساسوقه لك في ختام القصةمن واقع حياتي الآن

يسميني أهلي صاحبة الشورى وهذا يعطي دلالة على حسن حكمي على الأمور
وعليه دون أن أرى صورة الفيس بوك التي تتشدق بها فأنا أيضا جميلة كفينوس الشريرة التي صورتها
وأزيد ولله الحمد بنعمة العقل الذي يثني عليه الجميع حتى يومنا هذا

تزوجت من ابن عمي صغيرة
في هذا الوقت جهزني والدي جهاز غير تقليدي وغير عادي أثار غيرة أخوتي البنات جميعا
مفهومة يعني بتجوز ابن أخوه وفرحان جدا إن العائلة متحدة

مبدأيا عمري ما نظرت لإبن عمي كعريس محتمل 
دائما كان صديق وأخ وسر إخواتي الأكبر مني
وطلبه ليدي كان أمر غريب لكن العائلة كلها أقنعتني إنه أحسن زوج وبما إني لا بحب ولا لي علاقات فاحمد زي الحاج أحمد

تزوجنا وكانت حياتنا رائعة
وللعلم أيامنا آخر زمن الرجال
يعملون خارجا ويساعدونا داخلا وينهالوا علينا بالهدايا
لا يطالبونا بمرتب ولا يقولوا ما اسمعه اليوم انتي في البيت ومسئولة عنه من الألف للياء 
إشترى باسمي أملاك ورصيد في البنك على مدار الأيامولم أكن حالة خاصة فكل اخوتي البنات ازواجهم عطوهم دون شغل او مَنّ

زوجي تحديدا مرح جدا ووجوده في الحياة مبهج بشكل عام
لا بيبطل ضحك ولا بيحب الغم ويتمنى يكون فلاتي بس انا عمري ما اعطيته حجة
زيارة أهلي تسعده وما أن يخطو أهلي داخل بيتي حتى ينزل ليأتي بالكباب والتورتات ويعمل جو رائع ومرح جدا
ماهم في الأخر أهله برضه
أنا أيضا أعشق الضحك وجو المرح حتى لو حزينة 
مفيش كازينو في مصر الا وسهرنا فيه ومفيش سواريه حد لبسه الا وكان عندي الأول ده غير اني طول عمري بلبس شيك جدا ومن ماركات عالمية
مش بحب حد يتدخل في أحزاني وخصوصياتي
وأي مكان وبشر كئيب لا يمكن أتواجد في محيطه

المقدمة المملة دي يا أخ لازمة علشان تشوف قد إيه أنا حبيته تدريجيا حتى أصبح أغلى من نور عيني نظرا لعطائه ومرحه وحبه للدنيا
وبالطبع هو قال لي إنه بيحبني من يوم ما جيت الدنيا وكفاية إني متربية على إيده

أنجبنا طفلين معاقين إعاقة تامة عقليا وجسديا
ابني الآن بالطبع في عمر الرجال ولكنه ليس مثلهم
إبني أخدمه كطفل عمره تسعة شهور بالضبط دون زيادة أو نقص 
وبنتي رحمها الله توفت في السابعة من عمرها

بالطبع ذهبنا لعدد من الأطباء
للكثير في الواقع
آخرهم كانت الدكتورة سامية التمتامي في مركز البحوث أوائل الثمانينات على ما أتذكر
"إضافة من ستيتة: الأستاذ الدكتور سامية التمتامي من الرواد في علم الأمراض الوراثية في مصر وأول باحثة عربية تحصل على الدكتوراة في علم الوراثة البشرية"
الدكتورة سامية بعد الفحوصات قالت كلاكما سليم والمشكلة في صلة القرابة
هناك حليين
الأول ان كل ما أحمل طفل نروح لها عند عمر الجنين أربعة أشهر وتجري تحاليل ومتابعة
ان كان سليم يستمر الحمل وان كان مثل أخويه نجهضه
وإما نتطلق وكلا منا يمضي في سبيله وها نخلف بعون الله اطفال زي الفل
أيامها كنت في عز جمالي وشبابي وصحتي

رفض زوجي كلا الحلين وقال بالنص 
ضفرك اللي بيطيره المقص بخمسين عيل وانا مش عاوز ولاد ومش عاوز اسمع القصة دي تاني
توفت ابنتي وحزنت عليها جدا وفتحت معه الموضوع تاني ورفض تاني
ومهما حد فتح الموضوع من الأهل يتعصب ويتخانق وانا مش عاوز عيال
طب هل انا كنت عاوزة ولاد؟ 
مؤكد كنت عاوزة بس مش من حد غيره 
ولا غصب عنه وبخديعة حمل هو مش موافق عليه
أسهل حل إني احمل دون إعلامه وها يعمل إيه يعني ولا يملك إيه
بس دي مش طريقتي في الحياة والإنجاب حق لإتنين مش ينفرد حد بيه

راحت الأيام وجت وبقى عمري 53 عام وهو اصبح في الستين
وكنا في بيتنا الصيفي وذهبت لقضاء مشوار وعدت لأجد جارتي الشابة عنده بمفردها وبشكل مكنش اول مرة ألاحظه
كثرت ذلاته وتناقصت قدرتي على الاحتمال والتطنيش 
بدون دخول في تفاصيل مهينة وكون دي مش أول ملاحظة وقلة قيمة
طردتها فورا فأنا لا بلف ولا بدور ولا ضعيفة ولا قليلة حيلة
واتخانقنا وقلت له لو مش قادر تعيش معايا وعاوز واحدة تانية طب ما تطلقني اسهل
نزل جاب المأذون في لحظة وبكل سهولة وبتدبير رائع جدا وتسلسل منطقي ايضا
هي دي التمثيليات اتعلم مش اللي حصل لك
وقسمنا المعيشة هو بيتنا الصيفي وانا القاهري
وكده كده أنا عندي دخلي من فلوسي اللي في البنك ومن ورثي من أبي

انت ليه بتقول انك كنت مصدوم
على الأقل انت راجل
انا انثى بلا عمل يشغلني
وعمري كبير وفرص السعادة تاني قليلة
وبولد معاق تماما ومش ها اعرف أخلف معاه أخ أو أخت
وبترمي في لحظة خناق عادية جدا وبسهولة جدا لتدبير مسبق وتفكير شيطاني فجائي وزن على النفوخ أمر من السحر

المهم اتفقنا ان ابني معايا في فصل الشتاء ومعاه في فصل الصيف
بعد شهر واحد من وجود ابني معاه ارجعه لي وقال 
بصي انا مخلفتش والواد ده اعتبريه مش ابني وانا مش مسئول عنه جمله وتفصيلا
أنا ها أحاجه يوم القيامة إن شاء الله أمام الله في الكلمة الكبيرة دي

وذهب تزوج من بنت فلاحة عشرينية
اصله ياعيني افتكر فجأة إنه نفسه في الولد
خلف ولد عايش ربنا يخليه له وولد توفى ساعة الولادة 
ماشي طول النهار والليل شايل ابنه على كتفه زي الملك

عاوز تسمع ايه 
حالتي الآن لي الكثير جدا من الأصدقاء وطول عمري عندي اصدقاء واجتماعية
بحب الموالد جدا وبعمل خدمة وأكل للفقراء في كل مولد
بروح النادي وبود اهلي وعيالهم اللي زي عيالي
بخدم ابني الشخص الوحيد اللي نفسه بليل بينيمني 
لكن لما بقفل علي الباب بتعب نفسيا جدا
بخاف اتصل بالناس ساعة الوحدة لأن محدش فاضي لحد
بتونس بأنس الله وقراءة القرآن وخايفة أموت قبل ابني لأنه محدش فعلا بيعرف يخدمه ولا بيستحمله لأن حالته صعبة جدا إلا علي انا وأبوه اللي قال مش ابني
كمان بتونس بالمنتديات والمدونات والجرائد والكتب على الكمبيوتر اللي علمني عليه ولاد اختي الصغيرة اللي متعلقين بي 
ناس كتير بتحاول تخليني مش وحيدة ولله الحمد
بس انا وحيدة
فيه ساعة كده ببقى محتاجة بني آدم
لا كتاب ولا قرآن ولا وحدة
فيه ساعة بتساوي سنة من كتر ثقلها على القلب
عيد ميلادي الأخير لم يتذكره أحد
في الأعياد كل واحد في بيته ومع عياله واحفاده وبيدعوني بس انا مش بحب اكون تقيلة على الناس

تقدم لي مؤخرا عضو مجلس شعب وراجل جدع جدا 
ومستشار على المعاش
وشيخ غني ابن شيخ كبير جدا والإتنين معروفين
ولعلمك غيرهم من قبل كمان
بس الرجالة دول عاوزين ايه من واحدة في سني؟
الجمال اللي بيشوفوه بره مؤكد مش ها يشوفوه جوا ومهما كان شكلي جميل سني له حكم
عاوزين ضحكتي الرايقة وكلامي اللي بيحبوه وشورتي الناضجة بس؟ وهو فيه راجل كده
عاوزين ست تستحمل تتعود على طبع تاني وانا اجيب منين عمر علشان اغير طبع عودني عليه واحد تزوجني وانا بنت 19
ولو حد اتجوزني ها يستحمل ابني ازاي ده اهلي مش بيحبوا يقعدوا جنبه علشان بيريل وبيصرخ مستمر وغيره حاجات تانية كتير 
ياما صعبت علي نفسي بيني وبين نفسي والناس بتداري ولادها مني
ياما اخفيت كسرة نفسي أمام ناس ميسوش جزمتي وعاوزين يقولوا انهم عندهم نعمة مش عندي على جمالي وأصلي وغنى أهلي

الراجل لا بيعيبه سن ولا قلة عقل طالما جيبه منتفخ
أما الست فبقول لكل واحدة لو عندك فرصة تخلفي عيل 
يسندك في الكبر ويونسك هو وعياله وتسيبي الفرصة علشان راجل
لا تلومي بعدها إلا نفسك لأنك بتلعبي لعبة مش مضمونة خالص
وبتقامري على اخلاص ابن آدم اللي قلبه متغير

طب هل بكره زوجي
أبدا 
انا مؤمنة انه مكنش لي ولا ممكن يكون لي في الآخرة
ومتأكدة إنه ظالم وحقي ها اخده منه عند الله يوم الحساب
ووالله ما زعلت انه خلف وحزنت جدا لما ابنه التاني مات
عكس ما الناس اللي بتجيب أخباره فاكرين
أه ما هو انا مش زي حضرتك اقدر اقطع صلات
تعرف يعني ايه كل حد مش بيحبني في عائلتي الكبيرة المنتشرة او له عداء مع ابي رحمه الله يكلمني علشان يحكي لي اخبار طليقي
ماهو ابن عمي وها اسمع ها اسمع
في فرح في ميتم في قطران ها اسمع

عمال تنوح يا ستيني وربنا عوضك بزوجة وابنة واحفاد
ولا شغلك اتضر ولا صحتك ولا فقدت شيء الا مال
والمال اصلا ولا يسوى امام يوم واحد من وحدتي وكسرة نفسي امام نفسي والناس


بتنوح على ايه يا قوي ياراجل ياللي كلك مزايا وكلي عيوب
ده انا بضحك بعد ما قرأت قصتك

فعلا الحمد لله أني أنثى وبقلب أبيض وبروح متسامحة وبأمل في الله
مع هذا الإبتلاء وإلا كنت انهرت مثلك يا أيها الرجل المعقد الضعيف جدا

هناك 17 تعليقًا:

مدونة رحلة حياه يقول...

السلام عليكم
كان الله فى عونك وهكذا ابتلاء الله بعباده المؤمنين ليختبرهم ويرفع من درجاتهم فاصبرى
عسى الله أن يفرج عنكم وان يجزل لكم الثواب

عاشقه الرومانسيه يقول...

وجعتى قلبى بجد
كان الله فى عونك

Haytham Alsayes يقول...

فعلا ربنا يصبرها
انا قريت القصتين القصة اللي فاتت والقصة دي
الاتنين صعبين اوى
بس اللي اثرت جدا معايا هي دى
لان في ظلم واضح في الموضوع
وانا رأى انها تصبر وتحتسب بالنسبة لابنها
وربنا يجازى كل واحد ظالم

تحياتي يادكتورة

أنا - الريس يقول...

بعد السلام والتحية
مش هعرف انصح واعمل فيها مفتح
بس انتي بصبرك دا ليكي رضي الله وما بعد رضاه مفيش رضي إن شاء الله أو هكذا ادعو ليكي .

سيدتي أنا عارف إن جوزك غلط وغلطه كبير بس احنا بشر .. أنا مش بدافع عنه والله .. ان يتحمل الإنسان أخطاء نفسه أمام الله شيء يكاد يكون مستحيل .. مبالك واحد ظالم لأهله ولولده .

انا هقولك حاجة مش عارف هتوافقي عليها ولا لأ .. اتجوزي .. ومتحطيش ابنك سبب .. دا ملاك ربنا يعته ليكي .. واشرطي علي اللي هتتجوزيه .. رضي كان بها .. مرضاش .. يبقي الطريق اللي يودي .

أو

ممكن تكفلي طفلة يتيمه معاكي في البيت وما أكثرهم .. هتكون عليكي أحن إن شاء الله من أي حد .. ربنا يكرمك ويسهلك .

أنا عارف اني نصحت بس دا عدا ولا هشتريها .. ربنا يكرم أصلك يا كريمة يا بنت الأصول .

البنفسج الحزين يقول...

ياااااااااااااااااه
معلش انا مش عارفه أعلق دلوقتي لأني بعيط
هرجع اعلق تاني لما اتمالك نفسي...

سواح في ملك اللــــــــــــــــــه- يقول...

الي جميلة الخلق والطباع
وجميلة القلب
دانتي بستين الف راجل
جامدة وصلبة وربنا مديكي عقل وثبات
وجكمة كما قلتي
بس خديها كلمة من اخ اصعر
يامن سيرت الاقدار
تيقني ان ربنا شايللك خير كتير
وده مش كلامي ده كلام ربنا
اقري في سورة الكهف قصة
سيدنا الخضر مع نبي الله موسي
وخدي العبرة
ياايتها المستعينة بالله ليقتص لكي
لن يخذلك الله ابدا

ستيتة حسب الله الحمش يقول...

اسمحوا لي مبدأيا أن أشكر صاحب قصة ازهرت ايامي بعد الجدب
انا بشكر حضرتك جدا وده يوضح انك اهل حق
وحقيقي لو اي حد منا وقف جنب اخوه والتاني تقبل منه بصدر رحب زي حضرتك ها نكون احسن ناس
انا متأكدة انك حطيت صورها لاقتناعك ان صورها جزء من ماضيك ولم تقصد تشهير او انتقام
اصلا الموضوع ولا فيه انتقام ولا غيره لأنها كده كده غير مضارة
لكن كونك تشيلها
فزي ما فرحت من قلبي لإن ربنا اعطاك الذرية بعد طول انتظار فانا سعيدة بتقبلك لكلامنا واقتناعك انه مش حقك صورها النهادرة
واخيرا نحن اخوه في الله ليس بيننا مصلحة ولا عكسها وأنا سعيدة بتواصلك
"لم انشر التعليق برغبه صاحبه وليس اجتهادا مني"
ربنا يظلنا في ظله يوم لا ظل الا ظله

تحياتي

ستيتة حسب الله الحمش يقول...

آه بالمناسبة ها يحصل ايه لو بطلت تتعدى علي بالكلام؟
انا مش سهل اتقبل اكتر من كده
ومراعاتي لفرق السن ممكن مع جنونة الستات الناقصات زي ما انت عارف تطلع بالمناسبة
وياسيدي انا لو مغرورة فلنفسي ولو طيبة فلنفسي برضه
والحب ده مش بإيد حد ومين فينا ميحبش الناس تحبه وتحضنه معنويا
ارجو ان تكون صديق للمدونة وخاصة بعد قراءتك لقصة اليوم
بالمناسبة هي بعتته كتعليق لكن انا شفت ان اللي يشوف بلاوي الناس تهون عليه بلوته علشان كده حطيته بوست

تحياتي كمان مرة

ستيتة حسب الله الحمش يقول...

إلى صاحبة تعليق واسميته انا اجدبت ايامي ظلما

رغم ان حضرتك لم تطلبي من حد ردود بس ممكن تسمحي لي اتناقش معاكي؟

ليه حضرتك مش عاوزة جواز؟
ايه المانع
ليه احنا الشعوب الوحيدة اللي حاطة سن معين وبعده نبقى إكسبيرد

دلوقتي اللي حضرتك ها تتزوجيه هو كمان مش صغير
وفعل العمر عليكي زي فعل العمر عليه
هو مش شاب ولا صغير
كون جوزك تجوز بنت عشرين ولا تلاتين دي مش القاعدة للعقلاء
ها يعمل ايه معاها بعد الخلف
ها يستعمل ادوية تأثيرها ايه على صحته وقلبه لأن هي مش متجوزاه علشان تخلف ووان فور ذا جيم
طب ها يتكلم معاها ازاي؟
ده راجل ها يدخل بيته يخلف ويسايس في واحدة مهما كانت عاقلة فهي استحالة تتعود على طبعه برضه زيك
اللي بينقل لك اخباره بينقل الظاهر
لكن تأكدي ان فيه عدل لأن ربنا اسمه العدل

العاقل اللي شاف جمالك الحقيقي مش الخارجي بس وفي سن زي ده عاوز حد يكلمه اكتر من اي شيء اخر
ايوه وعاوز الشيء الأخر بس بقدرة تناسب السن يعني مش اعجاز يعني :)

وليه تتجوزي جواز كامل
انتي مش معانا اليومين دول ولا إيه
بقى فيه نوع من الزواج لكبار السن شفته هنا وفي السعودية ومريح جدا
كل واحد في بيته وصحاب في الحلال بيخرجوا مع بعض ويتكلموا مع بعض ويقضوا ساعات معدودة مع بعض وكل واحد بعد كده له حياته علشان الظروف
وبكده مش ها تهملي ابنك
ولا ها تجيبي واحد لا يتحمله
ولا ليه دعوة بابنك من اساسه
واللع انا شفتها في كذا صديقة ومرتاحين جدا والحب بينهم مشعلل في الدرة دائما علشان مبيزهقوش من بعض

فكري كده ومتضيعيش حد ارتاحتي له من بين ايدك وخاصة لو واحد جدع او واحد متدين او واحد عقلك وعقله مطبعين مع بعض

كل تمنياتي الطيبة لك وربنا يكرمك وتفرحي دنيا وآخرة

هبة فاروق يقول...

سيدتى الجميلة والرائعة بعد السلام
انتى انسانة صلبة وقوية اعجبنى فيكى
صبرك وجلدك وتحملك لابتلاء ربك وتقبلك لة
وانا معكى يا سيدتى فالرجل دائما مميز
ولة الاولويات والاختيار فمن حقة ان يترك او يرجع او يوصل ما فات ومهما كبر
فى السن فهو يعبر عن هذا الكبر بانة نضج
اما الست عندما تكبر فهى فى نظرة عجوز
فى النهاية اقول لكى لا تدفنى راسك فى الرمال
كونى امراءة تحب الحياة واعطى لنفسك فرصة ثانية وشاركى حياتك مع رجل تختارية بنفسك فيكون الاخ والحبيب والصديق
شكرا لك ووفقك الله تقبلى مرورى ومتبعاكى ان شاء الله

Unknown يقول...

دكتوره انا بشكرك جدا وبشكر الراجل الستيني على استجابته للنصيحة وربنا يسعد ايامه وايامكم جميعا ويوفق صاحبة الرسالة للي فيه الخير ليها ولابنها

adel يقول...

مع احترامي لصاحبة القصة وتقديري الكامل ليها

بس هي ليه قلبت حناقة بين بوست سابق والبوست ده
كل واحد شايف موضوع نهاية الكون

حضرتك زعلانة من اللي حصلك(هو يضيايق ويتعب) بس حضرتك حتي نفسك مكان اي ست ليها قصتك ومش حلوة ولا جميلة ومش متعلمة ولا ليها مصدر دخل
كانت تعمل ايه ؟؟

بلاش
حطي نفسك مكان بنت وعايشة في الشارع وبلا تعليم بس برضه عندها نفس احساسك بالوحدة والالم !!!

كل واحد ربنا بيديله اختبارات علي قد طاقته

احنا مش هنقول انا مصيبتي اكتر او ااقل
بس لغة الحوار ممكن تكون من الراجل بتريقة عشان فعلا هو حس بالغدر
زي حضرتك بالظبط

غير معرف يقول...

http://bloggers-house.blogspot.com/2010/12/blog-post_18.html

غير معرف يقول...

صاحبة القصة

شكراياستيتة واسر في جدا انك تحطى قصتى وفرحت بالرد من كل الناس
كلامك صح الانسان ميعرفش يعيش لوحده ومهم ليه حب الناس حالتى النفسية وانا بكتب التعليق يمكن كانت مش تمام علشان كده بعتذرر عن حدة التعليق ومتاسفة للي زعل منه وحس ان قصتى اهون من ناس كتير وفعل انا اهون من ناس كتير الحمدللهبس كنت اقول ان الدنيافيها اكتر من القصة اللى فاتت
شكرا لرئيكم كلكم وهاافكر فى كل كلمة وكل فكرة وربنايلهمنى الثواب
انا ياستيية مقدرش اتجوزسر ومعمديش حاجة تستعدى انى ادارى جوازى ومشهااخبى عليكى انا خايفة جدا افشل ومينفعش فى السن ده اتعرض لكلام الناس
ربنا يديكم كلكم اللى نفسكم فيه وتتجوزوا ناس يكونوا معاكم لاخر العمر

شكراتانى

ستيتة حسب الله الحمش يقول...

صاحبة القصة

انا سعيدة بتكرار الزيارة
وانا يافندم لم افترض مطلقا زواج سري
انا قلت زواج مشروط
زواج حلال
كل اللي فيه انه مناسب لظروف الطرفين

وبالنسبة لقصة الشماتة والخوف من كلام الناس تحضرني قصة صديقتي الفاضلة السعودية ام عبد العزيز "اسم حركي" والست دي تطلقت بعد ما خلفت طفلين مباشرة وقعدت 30 سنة بدون زواج "على صعوبة تقبل هذا هناك" علشان تربي الولدين
كبروا وتزوجوا وهي تقدم لها ابو عبد الله
جابت اخوها وولديها وعقدت زواجها من غير ما تقول لحد تاني وخاصة من الستات
وقالت لو ابو عبد الله طلع كويس كان بها
مطلعش كويس زي ما راح زي ما جه ومش لازم الناس الغرباء يوصل لهم خبر
ونعوذ بالله من شماته الأعداء
واصبحت ام عبد العزيز اخر حلاوة وهي حق الطلعات والروحات والوناسة الله يسلمش :)
وكل ما ابو عبد الله يدق عليها تقول له يا ابو عبودي ايش دعوة ماني فاظية الحين
يعني من الأخر متوجعش دماغي انا مش متفرغة ليك ورايا مسئوليات
هي مع ابناءها وزوجاتهم وابناءهم على طول
ولما تحب تتفسح وتتونس تطلب ابو عبد الله او يطلبها وعايشة سنها اللي في الخمسينات عادي جدا وخلاص كل الناس عرفت
ودي مش الحالة الوحيدة اللي خافت من شماتة طليق او تحرزت

وبعدين انا حاسة من الأول ان حضرتك خايفة بس
والخوف مش لازم يكون من ترقب الناس
لكن بلا شك الطلاق خد جزء من ثقتك بنفسك وحسسك ان ممكن تكوني سبب فيه فخايفة من اعادة التجربة
لكن لو نظرتي لها على انها تجربة مختلفة تماما ولا تمت بصلة من حيث الشكل والمضمون للأولى
يمكن ترضي

ربنا يوفقك ويسعدك وشرفتينا

ستيتة حسب الله الحمش يقول...

إلى صاحب التعليق الي بعزه ومش للنشر

كويس انك عارف العيب فين ولازم تصر على اعادة الثقة طالما لسه عندك امل
لا تمل من المحاولة
انا عارفة انك مش ها تمل
وتذكر ان للحب الحقيقي قوة شافية

ربنا معاك

Kiara يقول...

اولا مدونة بجد رائعة يادكتورة ستيته

اينعم وجعتني اوي وكل حكايه فيها حكايه لناس لكن حياه لناس تانية

ربنا يكون في عونهم يارب ويجبر بخاطرهم ويجعل لهم فرجا عاجلا باذن الرحمن

اول موضوع قريته بعيدا عن انها غلطت انهاتهاونت في الخطوبة لكن الطلاق مش سهل وانها تسيب عيالها مستحيل لاني بشوف دا قدامي عشان خالتو سابت ابنها او بمعني اوضح اتاخد عنوة منها عايشه في جحيم واللي مصبررها عليه بنتها وانا اؤكد انها دلوقت لو خيروها بين انها تتحمل ومش تطلق في سبيل ان ابنها يكون معاها كانت هتقول اتحمل ولا فراق يوم عن ابني

ممكن تكون خبرتي قليلة ومش عارفة الحل ازاي بس انا بتكلم عن تجربة انسانه انا شايفة دموعها وهي نايمة علي المخدة ولما اتكلم معاها تقولي اصل مصطفى اقولها خلاص مش تكملي فهمت

بالنسبة للموضوع التانى

مش هقول فيه ولا كلمة

غير الدنيا فانية

بالنسبة للموضوع التالت

انا بكيت اوي ومن كتر اللي قريته بين حروفك

بس مش معاكي انك مش تتجوزي تاني

مش يمكن يكون خير ليكى

حد يعلم الغيب ايه

واخيرا

دكتورة ستيته شرف كبير ليا اني اعرف انسانة زي حضرتك