الأحد، 19 ديسمبر 2010

نظرية نحس أسرع تعيش مبسوط

هاي ستيتة
ازيك عاملة ايه وكلكم عاملين ايه
انا بكتب لكم من بلاد الثلج خارج مصر
ولادي وجوزي في مصر
بربيه
اه بربيه والله ولسه

قبل ما اقول ليه بربيه ولا ازاي عاوزة ارد على التعليقات اللي هنا واللي على المدونة التانية
بتاعة ليه بنرد على بعض في القصص والحكايات

بصراحة لولا القصص التي سبقتي مكنتش انا كتبت ولا خطر على بالي افضفض معاكم واخد رأيكم
احنا بنعيش في الدنيا سلسلة وحلقاتها متشابكة بس بشكل خفي
كل واحد منا فيه شيء من التاني وفيه ميت اختلاف عن التاني
ولولا الشيء اللي فينا من التاني عمرنا ما كنا حسينا كبني ادمين ببعض ولا شعرنا بألم الآخر
ولولا الميت اختلاف ما تميز كل منا عن الاخر

بحس اننا لو خمسين شخص جالسين في حلقة للفضفضة النفسية وقلنا ممنوع حد يقطع ما يرويه صاحب الدور
وعلى كل تالي لصاحب الدور ان يختار موضوع يتحدث فيه براحته وبحريته
بحس اننا بدون شعور كل واحد منا 
يا هيرد على اللي قبله 
يا هايوافق اللي قبله 
وكله ها يتكلم بالأدلة والقصص والرقائن
مش ها نلاقي حد متفاعل في السلسلة وطبيعي فجأة ها يقف ويقول عمرو دياب عنده حفلة يا كوليجز يووووبييييييي مثلا

يرجع مرجوعنا لسبعي وجملي اللي مهنيني ربنا ما يكتب عليكم
زميلي واحنا اطباء ومعانا ماجستير وهو خد الدكتوراة وانا لسه
انا لسه مش علشان اصغر منه
انا لسه علشان انا لازم اضحي علشان سبع البرمبة هو الراجل اللي مينفعش يضحي علشان الويلفير بتاع الفاميليا

تزوجنا عن حب او هكذا كنت اظن
جيران وساكن قصادي وبحبه ومنها لله الأفلام
من تانية جامعة واحنا معرفين اهلنا اننا بنحب بعض وعايشين مذاكرة وحب وسعادة واحلام
اتخرجنا اتجوزنا
كده حتة واحدة
اهلى عندهم عمارة ادونى شقة اللي هي ورثى بعد عمر طويل لبابا
قال مش انا يا هانم اللي اتجوز في شقة مراتى
والله فكرنى بمحمد صبحى وانا بحكى النهاردة هههههههههههههههههه

بابا كتب له عقد ايجار علشان ميسكونش في شقة المدام
وهو غير عداد الكهربا باسمه 
ثم اتبعها بالإحسان انه طرد ماما من شقتنا وحلف يمين طلاق ما تطلع برجليها "شقته" أبدا

نرجع لأيام الحب والبنج
قال لي يا حبيبتي نشيل البيت مع بعض ومرتبك على مرتبي وانا وافقت
نشتري عربية مع بعض وطبيعي باسمه وهو اللي ها يسوقها
يعني سبعى في نفس الشغل واسوق برضه بايدى الناعمين الحلوين
بس مكنتش اعرف اني ها اشيل كل شغل البيت بالكامل مش عارفة ليه ده مش بيخضع لنفس القانون

ومكنتش اعرف انه ها يجي لي شهر ويقول دخلت جمعية علشان بجهز اختي
تخلص الجمعية وبعدها بابا عاوز علاج وها ادفعه له
يخلص علاج بابا وبعدها اخته بتخلع جوزها وها يجيب لها المحامين
متخلصش المحاكم وبعدها اخويا بيتجوز ولازم اساعده
إييييييييه سجايري ومصروفي وشياكتي وبرستيجي
من اخته لأخوه لباباه هل ها تصقوا ان مرتبي هو اللي كان بيصرف على البيت تدريجيا

مش عارفة اعرفك على نفسي واحكي عنها غير اني بحب الستر
وبما ان كل اللي في الكلية عارفين حبنا القديم قدم سكاشن الفسيولوجي والأناتومي الله يمسيهم بالخير
فمش معقول اقول للناس ان مدعي الأدب والأخلاق والتدين ده سافل
بيشرب منكرات وبيضربني وبيصاحب نسوان وكله على حسابي

متطلقتش ومش ناوية
ايه جدوى الطلاق اللي عمالين الناس يتكلموا فيه مع  بعض دي
سيد سيده مين ده
لو الأغلبية العظمى مش زفت كان حال البلد بقى سياسيا واقتصاديا كده؟
أمال لو مش حاطة حكمة في المدونة التانية بتاعة نيلة كوانيلا كنا قلنا ايه 
بالنسبة لتفكيري الطلاق ده مبيحل ولا بيربط للأنثى المصرية الغلبانة اللي زينا
ضرره اكتر من نفعه
دي وجهة نظري

انا مش بقول الكل سيء الأخلاق زيه بالضبط
لكننا زيه بالقياس ويا لفوق شوية يا لتحت شوية وكله حوالين المتوسط الحسابي
علشان كده لا ها اتطلق ولا ها اشرد العيال
يانا يا هو وان شاء الله انا
زمان لما كان يطردني من شقة اهلي اللي غير عدادها وهو لم يدفع فيها مليم كانت كرامتي توجعني قوي
ولما طرد ماما دبحني مع انها كانت شايلة ابننا البكري علشان ظروفه وعلشان اخد الماجستير
ياما بليل قعدت افكر في مصيري المنيل بكل التشاؤم
ها ياخد شقتي وها اتشحطط انا بولادي عند اهلي ومحدش ها يستحملني وها يكيدني ويتجوز في نفس العمارة عندا فيا علشان اموت
وفضيحتي وسط زمايلي وبعترت كرامتي

المهم جاءت له بعثة الدكتوراة وطلعت معاه بولادي
عادي يا جماعة صلح وبوسة وهي الست عايشة جوا البيوت بحاجة تانية؟
وعلى رأي شغالتي (اللي ياما شافتني بتبهدل) انتي ملكيش شخصية يا دكتورة 
مع انك دكتورة 
ده انا رمضان (جوزها) لقيت صور ستات عريانة على موبايله 
جبت جيركن بنزين ورميته على العفش وعليه ولولا اخواته شالوني شيل كنت خلصت عليه ههههههههه
وجعتني قوي يا ستستة الكلمة دي ومش نسياها
مردتش عليها بس كان نفسي اقول لها مش كل واحدة مستحملة ضعيفة وقليلة حيلة

كان عندي امل الاقي معمل بره يرضى اعمل فيه ابحاثي وارجع اقفل الرسالة في مصر ولم اتمكن من ايجاد فرصة
هو بيقول تتفرغي علشان مش ها افضى لك وللولاد وخاصة ان الكبير معاق لخطأ طبي ساعة الولادة
ايوه يا ستي باب النجار
وكمان وصى مشرفه يرفض اني اشتغل في نفس المعمل علشان هو يتفرغ ويطلع له شغل كويس
عندا فيه وفي مشرفه اشتغلت من الباطن شغل غير بحثي وانتي عارفة مضيقين جدا على غير الاتحاد الأوروبي الشغل
ورفضت رفض بات انه ياخد مليم من شغلي لأ وصممت يصرف من فلوس البعثة بطوله كمان
مش ها اقول لك بهدلني في الغربة اد ايه
كفاية اقول لك انه كان بيدخل علي بصاحبته الأجنبية سكران في بيتي ويقول لي اني متخلفة وهي مجرد زميلة
مش صاحبة واحدة كتير واللي تزعل من بيتها تيجي عندنا علشان ده راجل شهم 

ابني المعاق اللي في مدرسة متخصصة وبنتي وابني التوأم اللي في حضانة وشغلي وتحمل تيس لمدة اربع سنوات

رجعنا مصر ابني الكبير توفاه الله
حالتي النفسية كانت سيئة بس ايه الجديد يعني أنا نحست يا جدعان بقيت مبتسمة زي البورتريهات القديمة بس
هو بالقناع اللطيف الظريف المتدين اللي مش بيسلم على الستات في الكلية يا ناس
كتاكيتو بني
وانا زي ما انا صابرة ومحتسبة ومخرجاة من حساباتي وابتديت الدكتوراه بتاعتي

وراسلت نفس البلد اللي كنا فيها وخدت نصف بعثة حاجة كده اشتغل العملي بره باستاذ خارجي واقفل الرسالة في مصر باستاذ من كليتي
هو اتجنن من الفرحة فاكرني ها اخده معايا
قلت له استحملتك لحد ما خلصت ها تقعد بالعيال في مصر علشان انا انجز

بعد ما استنفز كل وسائل الإغراء والتهديد
عمل غلطة عمره وراح يشتكيني لطوب الأرض في الكلية
ميقدرش يشتكي عند اهلي اللي عارفينه بدون اقنعة
في يوم لقيت محكمة منصوبة لي من اتنين من اساتذتي 
وازاي اجرؤ اقول لجوزي ميسافرش معايا
وازاي عاوزة اوقف مستقبله العلمي البرلنتي
وازاي ده هناك ها يعمل بحوث تطلع مصر لزحل ان شاء الله
من الأخر انا بغير من جوزي علشان سبقني وأذكى مني وكده يعني

اظن كده عداني العيب والغبي هو اللي يصمم يصدق كذبه
جبت اللاب توب وفتحته وفرجتهم على عينك يا تاجر
كل فضايحه اللي انا حصلت عليها من إيميلاته لصور فاضحة له وللبنات اللي مصاحبهم لكله كله
مش عارفة ليه نسي مع الأيام ان تعليمه العالي مش مختلف عني 
وحكيت كل تفصيلة من أول الشقة وعدادها وانتي طالعة

"اظن كده يا اوختي تدخليني الجمعية وانتي مطمنة هههههههههههههه"

الراجلين جالهم حول وكانوا قاعدين في نص هدومهم
رجالة كبيرة محترمة على المعاش علماء من بتوع انما يخشى الله من عباده العلماء
كانوا واخدين بومبة طويلة المدى في متقي عصره وأوانه

وقلت مش مسافر وعلى جثتي ولو عاوز يطلقني يتفضل
خلاص بشتري شقة لنفسي في اكتوبر وولادي ها تقعد بيهم والدتي لحد ما ارجع ومليش ذلة تاني ومش مسامحاه في فلوس شقة اهلي
بمعنى اصح لأول مرة مش بس اقلب الترابيزة لأ وكمان انفي اني بتهدد من واحد زيه

تصدقي بالله
كان على عيني اشوف كسرة عينه ونظرات اللوم اللي في عينه
متشتميش ولا تضربي أنا عارفاكي هههههههههههههه
ما انا لما بفضحه بخليه يعمل كل العمايل السودة علانية من جهة 
وكمان بفضح ولادي وسط ناس من معارفهم المهمين اللي كده كده ممكن يتجوزوا منهم وممكن يشتغلوا معاهم والحاجات دي مش بتتنسي

يومين اتنين كانت القصة سرت في جنبات الكلية واصبحت ايقونة الصبر والتحمل وحبيبة كل الناس اللي كانوا شايفين اني شريرة وبحسد مستقبله العلمي الباهر

السادة الأساتذة حكموا وقالوا يقعد في مصر بالولاد ستة اشهر 
ولو لقيتي منه تحسن وتاب واناب
وبيرعى العيال عدل وسألتي ولقيتيه اتعدل خلاص 
يابنتي متخربيش بيتك وتشحططي ولادك وابعتي خديه

انا باعتة الإيميل لسببين
اولا فيه فرق كبير قوي ان ست تعاشر راجل وهي مش مذلولة 
وواحدة بتعاشره باجبار
انا النهاردة مش عندي مشاعر الذل الأولى خالص
ولا بصحى بليل افكر في حالي لو سابني
الست لما تكون مش مجبرة ممكن قوي متهدش بيتها حتى لو معاشرة واحد منيل
ممكن بشكل عادي جدا تستحمل علشان ربنا يوفيها اجر الصابرين
والست بتاعة قصة مكررة لو مش مذلولة بعدم وجود مال وسكن كانت ها تهون عليها الحياة كتير
الذل بيخوف وبيرعب وبيجيب هلاوس
ومكنتش ها تحس باحساس القهر بالشكل ده
بل كانت ها تفكر انضج واسرع وتقدر تحل المشكلة

وتاني سبب ان العيال وحشوني قوي 
وهو في مصر من 8 اشهر وعلشان اجيبهم لازم اجيبه
كمان انا بحب اكون أد كلمتي وانا قلت للحكماء المحكمين ان كلها 6 اشهر وانا تجاوزت المدة المتفق عليها 
مش ها اقول لكم هو نازل فيا غرام وحب وهيام ومسجات ابن اللذينة هههههههه

أنا مش عارفة تماديت في انتقامي منه ولا كده عدل
انا مخططتش للإنتقام ولا للي عملته
كله جه زي ما تكوني فتحتي الهويس يا فؤادة ههههههههههههه
ولو ده عدل ما يمكن يخلصه مني بحركات مضادة ونرجع للماتش تاني 2-1
ولو مش عدل يعني ازاي مش عدل

ها تقولوا هو استحمل كل ده ليه؟ 
معنديش امر مؤكد
يمكن لأنه عاوز هنا وعنده امل يجي وعاوز يعمل بحوث الترقية هنا وعاوز يعك هنا
كمان يلاقي فين خدامة جوا ومورده اقتصادية بره ومتحملة لقلة ادب بره وجوا
مين دي اللي من نفس مستوانا العلمي والأدبي ها ترضى بيه بعد ما اهلها يسألوا عليه
ده بقى اشهر من كلينتون يا رجالة ههههههههههه

وانا عارفة مهما حصل ديل الكلب مش ها يتعدل ولو علقوا فيه قالب بس خايفة يجي يتصنع مشاكل بالعافية علشان يعطلني
انجزت حلو قوي علشان لوحدي بس اكتر من كده بدون العيال ها اتجنن فعلا

عجبني تعلقك على المغتصبة اللي بيحسنوا قتلتها
تعرفي ان واحدة نصحتني وقالت لي ما تشربي معاه يا خايبة احسن ما واحدة تانية تشرب هههههههههههههههه
الست عاوزاني اشرب خمرة واقول انا جدع علشان مزاج المنيل يتحملني ويقدر يعاشرني
وواحدة تقول لك البسي له شفتشي ههههههه
على أساس إني الدكتورة عفت ولا شوكت مثلا
وكل واحدة بقت خبيرة علاقات زوجية 
الحمد لله اني سافرت بسرعة لحسن الستات دول كانوا ها يجننوني ويخرجوني من حالة التنحيس

القصص وتعليقاتكم خليتني اشارككم همي اللي مش هم جامد الصراحة
خلاص انا نحست ومش بحس بألم منه زي الأول
بعد ما القرف يجي من اول حب والحب الوحيد وحبيبي دائما وكل الافلام العربي دي
كله كله بيهون ومفيش ألم اكبر من ده
انا مش قصدي انكد عليكم بالعكس
ده تفاعل تجارب وتبادل ثقافي  وجلسة نفسية جماعية رائعة
وعلشان لو بنت واحدة قالت معرفش ومكنتش اعرف نوريها شغلها وحسرة عليها يا حسرة عليها

وكل ليلة بليل قبل ما انام اقعد افكر اعمل ايه اجيبه ولا اسيبه لحد ما انجز كمان شهرين 
طب والعيال 
لحسن تكبر في دماغه ويخليه في مصر عندا في واقعد بقية السنتين من غير العيال
الله يقطع الجواز وسنينه

وسمعوني اغنية انا كنت بعتبرك بجد كتير عليا بس اكتشفت ان انا اللي كتير عليك يا سبعي



هناك 16 تعليقًا:

ستيتة حسب الله الحمش يقول...

صديقتي المنحسة :)
انا النهاردة طول اليوم امام الكمبيوتر علشان مديني اربع كورسات الترم الجاي
عاااااااااااااااااا
كله ببلاش يا اوختاه
فمش ها اعرف اقول حاجة النهاردة غير

1- انتي دمك شربات مكرر ربنا يفرجها عليكي
2- لأ انتي متنفعيش في الجمعية بس ممكن تديني رقم الرفيقة الشغالة :) هي دي العضو الصالح فعلا
3- يا اختي الأساليب بتاعة التوحش بقت بتطور بشكل غريب
ده احنا واضح اننا كبرنا ورجالتنا هديوا
ومحتاجين كصقور قديمة ندخل دم جديد على الحزب بقيادة عز "مرات رمضان" علشان نطلع على الأساليب الحديثة ونطور نشاطنا :)

ان شاء الله خير
بس بكره نشوف رأي الناس ايه وربنا يهديكي للصواب

أنا - الريس يقول...

ممكن أقول نصيحة للأخت .
والله من شاب لسه متجوزش عشان تحذر من نصحيتي :
" إن أبغض الحلال عند الله الطلاق "
بس أطلقي منه .. مع احترامي ليه لاني معرفوش بس اللي زي البني ادام ده " ميتخلعش من الرجل "
انفدي بجلدك انتي وولادك بدل ما يجيب لكم العار طول العمر .

Haytham Alsayes يقول...

مش عارف اقولك ايه الصراحة
بس بصراحة الرجالة دول عاوزين حرقة
بجد انا بقولك اهو مش انا شاب ولسة متجوزتش بس بقولك ان الرجالة المتجوزة دى وبالاصناف المذكورة دى ربنا يهيديهم بجد

عموما مشكلتك بتهايقلي اوشكت علي الحل او حضرتك يادكتورة عملتي الصح باللي انتي عملتيه وسافرتي بس وممكن الطلاق يكون حل

لكن الفضيحة بتاعة الدكتور والبنات اللي علي الاميل دى بقت فضيحة ويستاهل بس انا عامل علي اولاد حضراتكم هما عرفوا بالحوار دة ولا لا لو عرفوا هتبقي مشكلة ان ابوهم هيعرفوا انو كدة

اللي صعبان عليا في كل دة الاولاد ونظرتهم لابوهم
بس الطلاق ممكن يكون حل
وربنا يحلها من عنده وييسر لكي الخير دايما
وقادر ربنا يهديه زى ماهدى ناس كتير زيه

وربنا يصبرك ويجعله في ميزان حسناتك



تحياتي

وجهة نظري يقول...

إيه الهم دا؟؟ إيه الخيبة إلي بقينا عايشين فيها دي؟ أنا مارضيتش أعلق على حكاية العجوز الستيني والخيبة القوية ولا على الخمسينية إلي بعده، و كل واحد في خيبته فاكر إنه جاب أخر الاحزان!!!!

في إيه يا ناس؟ حصل إيه فالبلد وفي ناسها؟ فين الرجالة وفين الهوانم؟ بلاش .... فين الناس إلي بتفكر تفكير سليم؟ كله بيفضح، وكله بيشمت، وكله بينتقم ... مفيش واحد بياخد خطوة صح يظبط الحياه، أو ياخد خطوة عقل يحترم بها نفسه و عيلته وأولاده أو اولادها؟

وعلى ذكر العيلة ... مفيش ولا واحد من الأربع قصص إلي شفتهم هنا جاب سيرة موقف عيلته أو عيلتها، كأنهم إتجوزو انقطعوا من شجرة بعدها، مفيش أب ولا أم مفيش حتى عم ولا خال ولا كبير عيلة يقلهم إتلموا ولا يقف للغلطان أو ياخد موقف حاسم. هو جرى إيه بظبط، زي مايكون أهل الزوجة رموها وماصدقوا يخلصوا منها، ولو فكرت ترجع تاني تبقى وقعتها سودا، وزي مايكون أهل الزوج مايصدقوا خلاف ويطلعوا عقدهم على الزوجة.

دي إيه الخيبة إلي عايشنها دي.

السيدة إلي فرحانة بنفسها وبتحكي حكايتها بقولها "جتك خيبة على الدكتوراه إلي معاكي مليتوا البلد" ... جوزها "لو يستحق لقب مذكر أصلاً" ميستحقش أي تعليق.

مدونة رحلة حياه يقول...

السلام عليكم
سبحان الله الدنيا دى فيها العجايب
بجد اكيد فى حاجة غلط
بس المشاكل بقت محاوطه الناس والبيوت
مش عارفين يلاقوها منين ولا منين
دكتورة اصبرى اعانك الله

ツSmiLeY AnGeLツ يقول...

السلام عليكم
اصح اني مش متجوزها ومن اصله مافي شاب بحياتي
الحمدلله على هذه النعمة
اعذريني على كلامي
بس لو كان لك عند الكلب حاجة قوله ياسيدي
طلعي اولادك عندك وكملي دراستك وخذي الشهاده وبعد ماتتمكني وزي ماقلتي اشتري شقة بعدها اطلقي
بجد ممكن يعمل شي كبير
ممكن ياخذ الولاد منك ويلا يامحاكم ويمكن ياخذ هو الاولاد
مش مهم البرستيج وفيها ايه لو قالوا مطلقة
بصراحة يقولوا مطلقة ولا يقولوا زوجها يخونها مع حريم وهي ساكته
مش هيقولوا انك صابره من شان العيال لا
بيقولوا ساذجة
اعذريني على الكلمه دي
لحد امتى هصبري
ممكن يعمل فضيحة والناس كلها تبعد عنكم
اهون انك تطلقي ولا تعيشي منبوذه من كل الناس
اعذرني على كلامي
لكن هذا المفروض الي تعمليه
انك تطلقي
ربنا يفرجها عليك ويوفقك براستك ويخلصك منه
ماتزعلي من كلامي بس دي هي نصيحتي ويارب ماتزعلك
سلامي ليكي.

adel يقول...

هو انا مش عارف اكتب تعاطف ولا اضحك
بس علي راي د/ستيتة
حضرتك اسلوب حلوة قوي ويمكن حلاوة روح
في الحالتين اللي عملتيه صح قوي قوي الحقيقة

وكده كده مفيش شئ بيستخبي

اعتقد انتي محتاجة تفكري هل تكملي ولا لا ولو هو ممكن يضغط بالاولاد ؟؟

--------
د/ستيتة
الرفيقة الشغالة دي فيلم كوميدي لوحدها :)

غير معرف يقول...

يا للهول

نسخه أخرى من ستوته

!!!!!!!!!!!!!!!!!!!

سأقرأ في وقت لاحق

بعد استيعاب الصدمه

أتنين ستوته

ما عادش لينا عيش في البلوجر دا

ستيتة حسب الله الحمش يقول...

وجهة نظري

ليه بتهاجم الناس
وتشتمهم
ليه
مين قال من الأصل ان هنا مدونة كوميدية
ما معنى كل هذا السب في التعليق
يا اخي ولا اخت ولا زي ما تكون لو كانت حياتك سهلة فالناس مش زي بعض
ولو حياة الناس دي بالنسبة لك مش صعبة ولا تستاهل التعاطف فمن حقك متردش

انا لم اجد في تعليقك كله
الا قرف
والله العظيم ده انا نفسي قرفت مش صاحب الحدوتة
ولما كل الناس خايبة
وكل الناس معندهاش اهل
وكل الناس شايفة احزانها اكبر حزن
وكل الناس معندهاش عقل
من الآخر كل الناس زفت
طب وانت ايه
ما انت من جملة الزفت برضه

لا حول ولا قوة الا بالله
فعلا على راي تامر علي
تدني لغة الحوار

بعتذر عن نشر التعليق اللي اظن واضح للكل غم نفسي قد ايه

معلش يا جماعة انا قفلت جدا نفسيا ده غير انشغالي
ولذلك لو جت ردود تانية ها انشرها بلا تعليق

فعلا الحياة مليانة حاجات تغم بره وجوا
بس طبطبة الناس على بعض الصراحة اهم ما تبقى للإنسان المعاصر من مميزات

شكرا لتفاعلكم

وجهة نظري يقول...

لا معلش يا سيدتي، إنت خليتي ردي كأنه سباب بجد، وأن أنا دخلت شتمت الناس!! لأ وتدني لغة الحوار. أنا أسف جداً انك قررتي كدة، مدونتك وأنتي حرة فيها ورأيي وأنت بس إلي قرأتيه وشفتيه مقرف. شكراً.

سواح في ملك اللــــــــــــــــــه- يقول...

السلام عليكم
كلام بجد مش هزار
انا علي ثقة تامة ان الراجل ده
شوكته اتكسرت
وعرف واتعلم ان ليكي باس شديد
رجعيه علي ضمانتي ومتخافيش
من غير ديل كلب والا حاجة
انتي قطعتي الديل اصلا
انااسف بس ده كان وصفك

ستيتة حسب الله الحمش يقول...

صديقتي صاحبة القصة

اولا بحيي صبرك
مش اول صبر اشوفه في الدنيا يكسفني من نفسي وفي نفس الوقت يخليني احمد ربنا على العافية

شفت لقصص تشبه قصتك نهايتين في الحياة الحقيقية
ومهم نقول لك النهايتين علشان تاخدي بالك بس ولا ترثي لنفسك بعدين

النهاية الأولى نهاية ناس كتير بتنساها وهي هدى ربنا
ياما ناس زيه اما ربنا جاب لها ابتلاء عدلها او بدون ابتلاء ربنا عاوزه من اهل الجنة وهو يلبي الدعوة
وده شفته بعيني في احد اصدقاء والدي اللي زوجته حكت لي قصة سكر وعربدة وتحكم وبكائيات وحياة سودة مفيهاش حتى منفذ لعمل يلهيها بعيد عنه
وبين يوم وليلة مرض وهي وقفت جنبه بصحتها ومالها ودهبها وسبحان الله
كان صعب علي جدا اني اصدق ان انكل ابراهيم الراجل الشيك الذوق المهذب اللي مش بيفوت فرض ولا عمرة سنويا
هو نفس الراجل اللي حكت لي عنه اول زواجهما ولمدة طويلة
وعرفت انه لمدة طويلة لأن بناتها اللي في سني كانوا بيكملوا الحكايات معاها
يعني شافوا ووعوا وعرفوا كل شيء معها

ستيتة حسب الله الحمش يقول...

النهاية التانية اللي قالها اغلب المعلقين
وهي انك بس بتكسبي وقت يتربى فيه العيال بين اب وام
وبعدها لسبب معلوم من الحكاوي او غير معلوم زي أي تلكيكة ها تطلقوا

مهم جدا لو متغيرش مهما عملتي انك تكوني متوقعة النهاية دي وخاصة انكما في نفس مكان العمل وها تفضلوا في نفس المكان

بمعنى اصح بلاش تطور بينكم اكثر من كده علشان لو حصل انفصال يكون باقي خيط محترم تقدروا تتكلموا عن الولاد وعن الشغل

رأيي الشخصي انك تبعتي له عادي
اللي خلاكي يعني استحملتي اربع سنين سابقة ايه الجديد اللي مش ها تستحمليه

انا زي سواح بميل لأنه ها يبقى مختلف كتير
مش علشان مذلول وعاوز يعمل بحوثه بره
لأ
علشان فيه نوع كده من الناس يحب الندية
واللي اقل من الندية يخليه جبار
واللي اكتر من الندية يخليه يميل للخراب

المشكلة الوحيدة الكبيرة جدا اللي ها تكون بينكما
عدم الثقة
لا انتي ها تثقي فيه تاني واخلاصه
ولا هو ها يسمح انك تطلعي على اسراره ويفترض براءتك تاني بعد قصة الايميلات
وده بقى اللي مش بيتغير الا بمعجزة

وبما ان ربنا رب معجزات سبحانه
فبدعي لك من كل قلبي بالسعادة وهدى الحال
تحياتي

عاشقه الرومانسيه يقول...

والله انا استفدت من القصه دى وقصه اجدبت حياتى ظلما
ان مفيش حاجه اسمها حب ولا امان لراجل مهما كان مدى حبه وكلامه المعسول

ربنا يصبرك على ما بلاكى بجد
بس خدى بالك من اولادك قوى لانهم اكيد هيتأثروا بسيره ابوهم

وست مطلقه من راجل اخلاقه زفت افضل كتير من زوجه فى نظر الناس مغلوبه على امرها وراضيه وخلاص
انتى متعلمه وعندك شغلك اللى يغنيكى عنه
يبقى الاكرم لك انك تبعدى عن الشخص ده
بس بصراحه مش عارفه اقول ايه على صبرك وطولة بالك وروحك الحلوه او على راى عادل حلاوه الروح


ربنا يكتب لك الخير
ويهديه
أو
يهده

غير معرف يقول...

:)

انا هبطل ادخل هنا علشان اتعقدت

لا جواز صالونات نافع ولا حب ولع في السكاشن نافع

ماذا تفعل لو كنت مكاني :(

غير معرف يقول...

ههههههههههههههه عجبنى جركن الجاز اللى نزل على نافوخ رمضان والعفش ههههههههههه

دكتورة... انتى فعلا بمقاييس الناس مشفتيش حاجة بل بالعكس شفت ستات تقولك جوزى يصاحب بس ميتجوزش عليا أو العكس يتجوز ميصاحبش حاجة هبل... اللى يتجوز يلتزم ويحترم نفسه ويبقى مؤدب
وبعدين دكتور فى الجامعة يعنى المفروض خيرة المجتمع واحنا المفروض بتصرف بشكل راقى حتى لأننا بنتلخط بمستوى راقى فى العقل

أحيكى يادكتورة وصدقينى ديل الكلب مبيتعدلش المهم انتى لما تبعتى للولاده وله متضعفيش خليكى على موقف قوى برده واستمرى فى التأديب وطبعا يصرف على البيت امال عامل راجل ليه وعقد الإيجار يتلغى والشقة ترجع لأهلك علشان تشتروا مكان أوسع ويدفع فيه طبعا مش راجل ولا إيه

تحياتى لكى يادكتورة وانتى من الصابرين ان شاء الله بلا حب بلا وكسة كنت هقع نفس الوقعة مع دكتور زميل برده بس انا كنت بحبه جدااااااا وهو خسر حبى بقى وكان هيبقى نفس عينة المحروس الدكتورة جوز حضرتك كده كلهم رجاله ههنعمل إيه بقى