السبت، 25 ديسمبر 2010

لو أبويا يبقى كويس .. لو مش أبويا يبقى أحسن


انا قلت ادخل افضفض هنا مش المدونة معمولة لكدة؟
ولا ايه 
اكيد معمولة لكدة

انا يادكتورة شاب زى اي شاب 
لا مش زى اي شاب دايما ببص لنفسي اني معقد 
أيوة معقد
وانا عارف نفسي معقد من إيه
معقد من والدى
والدى بقي دة حكاية تتكتب في السينما
والفيلم هيكسر الدنيا والناس هتخرج من السينما استفادت حاجة مش عشان هو كويس 
لا العكس انه نوع مختلف مشفتهوش أو ممكن يكون موجود بس في حتة تانية
المهم والدى بيسافر لبلد خليجي من قبل انا ما أتولد 
ترك أمي حامل فيا وراح مرجعش إلا وأنا عندى سنتين ونص
ومن هنا تبدأ الحكاية 
أمي كانت بتحكيلي إنك كنت بتقول لخالك يابابا لانك مش شايف حد غيره
المهم مرت الاحداث ومرت السنين خاصة سنين الطفولة المهببة عليا 
ومحسيتش ان ليا اب
بيسافر كتير مشغول ربنا يعينه وسايبني أنا وإخواتي لأمي
 
بصراحة أمي دي يتعملها تمثال بدون مبالغة إتحملت تصرفاته وسفره وإسرافه في الفلوس علي اللي يسوى واللي ميسواش 
وربتنا احسن تربية وهو ولا دارى بينا عاملين ايه ولا احنا كويسين في الدراسة ولا لأ المهم 
أمي لما لقت إنه في السفر مبيجبش فلوس منتظرة لواحد بيتغرب وبيشتغل المفروض عشان يكون مستقبل كويس ليهم 
أمي خيرته بين أمرين 
ياإما يشتغل في مصر ويريبنا معاها ياإما يطلقها 
هو كان عنيد جدا معاها وقالها لا مش مطلقك وهاسافر 
وضحك عليها بكلمتين انه هيركز في الشغل عشان يعمل مستقبل وبعد كدة يقعد 

المهم سافر تاني عشان يكون المستقبل
وطبعا كالعادة الفلوس اللي بيكسبها مش عارف بتروح فين 
(أنا عارف إن أبويا ملتزم ومبيضيعش مثلا الفلوس في شرب أو قمار أو خلافه ) 
لكن كان بيضيعها علي اخواته وعلي عيلته وعلي الفشخرة الكدابة والمظهرية الفارغة 
طيب بالنسبة ليا أنا وإخواتي؟
طبعا طلعنا كدة من غير أب معرفش حد في الحياة غير أمي 
كنت منطوى جدا وأنا صغير وكان أبويا يرجع من السفر يقعد معانا 3 شهور ويرجع يسافر تاني 

كان غريب في البيت بالنسبة ليا عمرى ماشفته واحد من البيت 
بشوفه انه غريب 
شوية كدة ويمشي والواحد ياخد راحته في بيته 
زى اي ضيف يجي البيت تبقي بتتكلم بحساب وتتصرف بحساب 
وتاكل بشكل معين
وتنام بشكل معين لكن لما يمشي الضيف تاخد راحتك 
بالنسبة ليا كنت كدة ومازلت حتي الان

بقيت في الاعدادية وبفتكر يوم كنت ماشي معاه في الشارع 
وبحاول اصلح مشكله بينه وبين امي 
تخيلوا واحد في الاعدادية بيصلح اللي بين ابوه وامه 
عشان شايفهم كل شوية يتخانقوا اساسا في الفترة اللي هو فيها هنا
وكان سبب الخناقة اللي فاكر تفاصيلها حتي الان
بسبب ان امي كانت بتلح عليه انه يقعد ويربي العيال معاها 
لانها تعبت لوحدها من مسئوليات البيت
كنت ماشي معاه وقلتله انا محتاجلك انا كبرت ومحتاجلك وعاوز ابويا معايا
يرد عليا السفر دة لمصلحتك انت واخواتك 
قلتله طيب وحنان الاب اللي انا محتاجله 
يقولي يابني هو انتوا مجتاجين لحاجة 
انتوا بتاكلوا احسن اكل وتلبسوا احسن لبس وبتتعلموا كويس
 
ياسلام
بس كدة
من ساعتها اعتبرت ابويا اقرب للموتي
واعتبرت نفسي اقرب لليتم وفعلا انا اقسم بالله باعتبر نفسي يتيم من اللحظة دى 
تعرفوا اني قلما بقول ابويا او حاجة عنه قدام زمايلي وبتكلم اكتر حاجة عن امي

نيجي لفترة المراهقة اصعب فترة عدت عليا 
امي بذلت مجهود جبار معانا كلنا 
وكانت صاحبتنا جدا واستحملت انها لوحدها 
واعطتنا حنان ملوش زى وكانت مهتمة بينا 
اما الاب لا نسمع عنه الا تليفونيا 
كان ممكن ان احنا ننحرف في الوقت دة لانه فترة صعبة ومحتاجة اب زى ما محتاجة ام 
لكن امنا كانت ام واب وكانت شديدة وحنونة
في نفس الوقت

تخيلي يادكتورة انه كان بيكلمني في التليفون كل شهرين تلاته مرة لما يفتكر انه عنده ابن 
كان بيكلم اخواتي وامي لكن انا وهو مفيش كيميا 
انا مرتاح طول ماهو بعيد وهو ناسيني خالص

دخلت الجامعة وعديت سنواتها كلها بتفوق وابويا مش حاسس بيا 
عارف اني دخلت كلية لما كان بينزل اجازة 
ماقليش دى كلية ايه؟ دراستك في ايه؟ يعرف اني في كلية وخلاص
عكس اختي مثلا ان لما دخلت كلية عرف وكان متابع 
ماعلينا انا مش بتكلم في تفرقة لان اخواتي مظلمين معاه زى بالظبط بس 
انا اكتر واحد مؤكد انا اكتر واحد 
لاني طبيعتي حساسة جدا مش زى اخواتي اللي مكبرين دماغهم علي الاخر

تخيلوا انني مش فاكر انه حضني او باسني 
هتقولوا انت واد ساذج وكبر مخك كل دى حاجات عادى
لا مش عادى اكيد 
فيه ناس منكم مخلفين وعارفين ان مجرد لمسة ممكن تعمل في طفل 
عارفين ان مجرد الكلام يعمل ايه في النفسية
دلوقتي يعتبر انا اتربيت بدون اب
يعني انا كدة يتيم حلو الكلام

اللي زاد وغطي الايام الاخيرة دى
طبعا اتخرجت من الكلية زى زى اي شاب مصري اصيل يحفي علي شغل
ميهمش وايه يعني ما الحياة كفاح واجتهاد ولازم تتعب وتكافح
طيب كلام جميل
بس المفروض في الاقل مساعدة من الاهل شوية
طيب بطلب بقي المساعدة منه الايام دى
طبعا هو نزل المرة دى مقرر انو مش هيرجع تاني خلاص 
هو تعب وعاوز يقعد اخيرا طبعا 
قالي منين معييش
ينهار اسود
ازاى مش المفروض انت بتسافر عشانا وعشان المستقبل ولا ناسي كلامك
الحقيقة طبعا انه معهوش وصرف كل الفلوس في التعليم واللبس والالذى منه
وبس
 
اه وبس متستغربوش مفيش اي حاجة زينا زى غيرنا 
والمفروض انو نكون مش زى غيرنا 
اوانتم عارفين نظرة المجتمع للي بيسافر 
انو بيجيب الفلوس في شوال وهو جاي 
والنظرة دى عانيت فيها لدرجة اني اتخنقت من صحابي 
اللي شايفين وضعي اللي مش هو في الشغل من ساعة ماتخرجت 
وكان بيقولوا الواد دة مستني ايه؟ سافر يابني ادم مش ابوك بره 
خليه يشوفلك حاجة
عندهم حق طبعا بعد شوية ناس في شلتنا سافرت علي حساب اباهتهم او اخواتهم او غيره 
وانا المفروض الاولي في وجهة نظرهم طبعا
 
المهم حصلت مشادة بيني وبينه من شهر كدة 
وقلت له لازم تساعدني رد وقال كفاية علمتك احمد ربنا
طبعا انا تعبت من الرد دة وانفجرت فيه طبعا 
هاتقولوا حرام دة عقوق انا عارف بس بصراحة اتخنقت من الرد
وقلت له ياسلام بعد كل دة وتقولي مفيش كويس انك اتعلمت انت واخواتك 
طيب اقسم بالله العظييم مش عاوز منك حاجة
شكرا ياعم الحاج وانا هاعتمد علي نفسي 
ومش مسامحك والله ماهاسمحك طول عمرى 
جي بعد كل دة وتقعد بدون ما اتعمل حاجة ليا في المستقبل 
وكمان تقولي كويس انك اتعلمت 
طيب ما كل الناس اتعلمت واكلت ولبست من مصر
بس الفرق انهم اتربوا مع اب وام انا بقي اتربيت مع ام من غير اب

دايما كان بيقول اختي لما تكلمه في التليفون ايام ما كان مسافر 
ماما زعلانه منك ( في احدى المعارك بينهم )
يقولها اعتبروني اني مت 
طيب انا عاوز رأيكم بقي ينفع كدة دى كلمة يقولها
طيب انا بقي باعتبرك من زمان كدة

بعد طبعا ما اتخنقت معاه مبكلمهوش 
او بمعني اصح هو كمان واخد جانب مني
بناكل علي سفرة واحدة ومبكلمهوش
انا بعتبره ضيف بس مش هيسافر تاني لانه خلاص زهق من السفر
نفسي انا بقي امش من البيت دة واروح حتة بعيدة عشانه هو بس

معلش طولت عليكي
ومش قادر اكمل تفاصيل تانية مهمة في القصة دى لاني مش قادر اكتب خلاص
وتاكدى اني ببكي دلوقت لما افتكرت كل دة

هناك 16 تعليقًا:

ستيتة حسب الله الحمش يقول...

عزيزي الموجوع بقصة من امبارح شبه قصص النهاردة
لام الله من لامك
ولا ها الوم عليك ولا اقول لك عقوق
انت اساسا فاهم العقوق وها تصلح العقوق من نفسك ومش ها تتطاول عليه مطلقا بكلام تاني
ده انا متأكدة منه تأكدي اني اسمي ستيتة

المصيبة بقى يا عزيزي في اللي جاي
والخير برضه في اللي جاي
ها تقول لي ليه
اقول لك فاصل واشرح لك المستقبل وكأني بفتح الكوررررشينة :)

فاصل وها أواصل
وابكي براحتك وده حقك وانا متفهماك جدا
اكتر مما تتخيل
انا كمان عيطت
اهو كل واحد بيعيط على همه جنب هم اخوه

تحياتي لحساسيتك اللي مش مفرطة دي آدمية جدا
وها أرجع أرغي معاك تاني

متتعجبش من العنوان
ده انا كنت بقوله لواحد صاحبي متعرفوش من وانا عندي تسع سنوات :))

Ramy يقول...

أأأأه

وجعت قلبى انا ناقص يا عم

بس انا فاهمك جداً صحيح انا يمكن محصلش معايا كدة بس فاهم انت قصدك ايه

فاهم قصدك لما تكون عاوز حضن ابوك فى وقت عاوز تحس بالأمان

على فكرة دة مش عقوق

دة حقك

لو ان الاب و الأم لو معندهمش انهم يتحملوا مسئولية اطفال يبقى ميخلفوش

بس صدقنى يا صديقى انت تحمد ربنا

أعرف قصص مثل حالتك تدمى القلب
هم فقدوا طريقهم

انت لأ و ارجوا دة منك متفقدش طريقك
حط ربنا قدامك
ثم امك

و طريقك هيكون منور

ربنا يوفقك

أنا - الريس يقول...

اخي الكريم ..
ربنا يكون في العون .
وفي الحمل اللي انت شايله .
انا مش هعرف احد الحلال من الحرام .
بس
انت لو سافرت يبقي بتكرر نفس المأساة
اللي انت عشت فيها .
إلا لو إنت كنت عارف أنك هترجع تاني وتكون اسرة وتقعد معاها .
حاول تسافر بنفسك .. ومساعدة والدتك .
حاول تكون حنين علي اخواتك .
ومتخليش السفر يكون سبب إنك تسيب اسرتك زعلانة . مش منك . لا عليك .

أنا مش عارف أقول ايه .
بس اللي انت فيه يحتاج للطب النفسي .
وقبل الطب
القرب من الله للسلام والراحة الداخلية .
ربنا يوفقك .. اخي .
ويسعدك .
ويخلي الراحة قرة عينك . وقرة عين من حولك .

ツSmiLeY AnGeLツ يقول...

السلام عليكم
ربنا يهيده لكم
حاسة بيك
مريت بده لكن ابي رجع لنا ودائما جمبنا
الحمدلله
ان شاءالله ربنا يهديه ويرجع لكم ويحبك ويساعدك
سلامي ليك .

Ramy يقول...

تعليق بعيد عن الموضوع


يا خرااااابى ع الصورة (:

جميلة قوى

Dr/ walaa salah يقول...

ربنا يعينك

انت فعلاً إتظلمت لأنك مش شايف فرق بينك وبين اللي اتربوا مع ابوهم

يمكن هما كمان احسن منك

لكن خلينا نفكر صح

واضح ان والدك كان كل تفكيره انه يجيب فلوس لتعليمكم واكلكم بس

ومفكرش في الحنان اللي انتوا اتحرمتوا منه

يعني معلشي ومتزعلش مني مش هينفع معاه الكلام


بص لمستقبلك وزي ما كبرت من غيره

كون مستقبلك من غيره بردوا وصدقني هيكون مستقبل جميل لانه هيكون من صنعك

نقطه تانيه عشان اكون بتكلم على حق

مهما حصل إياك وعقوق الوالدين

ربنا امرنا بطاعتهم الا لو امرونا بالشرك

لكن غير كده لا تقل لهما اف ولا تنهرهما


معلشي كل واحد مننا له شخصيه

ووالدك شخصيته كده وانت مش هتغيره

احمد ربنا انك راجل وتقدر تعتمد على نفسك ومعلشي في الكلمه تقدر تستحمل البهدله عشان مستقبلك يكون كويس

لكن انت لو بنت اكيد الموضوع كان هيكون صعب اوي وصدقني انا اعرف بنات عاشوا نفس مشكلتك لدرجة ان ناس غريبه اللي ساعدتهم في جوازهم


فكر تاني في اللي هتعمله ومهما كان لازم يكون راضي عنك

إن شاء الله انت هتقدر تحقق مستقبلك واضح كده من كلامك

ربنا معاك

Unknown يقول...

السلام عليكم

أخي الكريم أؤيد كلام الدكتورة ستيتة في أني لا ألومك بتاتا...

فكم ذكرتني قصتك بقصة الأب الذي ذهب إلى عمر بن الخطاب يشكو عقوق ابنه، فلما سمع عمر تفاصيل تقصير الأب مع ابنه قال له: لقد عققت ابنك قبل أن يعقك!!!

حاسس بيك والله يا أخي.. وبكيت أيضا.. فقد تعرضت لمأساة الغربة صغيرا وكبيرا.. نجانا الله منها قريبا..

أعتقد أن رحيلك مؤقتا والبداية في مكان بعيد نسبيا (حتى لو كان محافظة أخرى) سيساعد كثيرا على تطبيب جرحك لتبدا حياة سوية.. كما أن بعدك أنت هذه المرة وتجربتك للغربة ربما يخفف من حدة شعورك السلبي تجاه أبيك، فهو في كل الحالات..... أبوك..! وسيحتاجك يوما ما.. وأتمنى يوم يحتاجك أن تكون لديك الطاقة النفسية لمعاونته...

هذا رأيي الذي ربما تسترشد به أو ببعضه.. على كل حال، أردتُ أن أقول لك: لستَ وحدك.

تحياتي أخي الكريم.

غير معرف يقول...

طبعا كل واحد منا محتاج حنان الأب او الام من صغرة بس فى مواقف بتمنع الحنان دا مثل موقفك
قسوة اب ...
او سفره وانشغاله ...
أو أو .....

زى ما عيشت حياتك بدونه ونجحت فى انك تكمل دراستك
كمل مشوراك بالاجتهاد من غير الاعتماد على حد حتى ولو كان الشخص دا والدك

بس بلاش تزعق وتعلى صوتك تانى عليه
عشان اكيد انت عارف وفاهم مدى خطورة ذلك

مش هتيجى بعد العمر دا كله وتحاول تصلح شىء اختفى زمان

والدك كبر ومحتاجكوا جنبه


خليكم انتم الاحن عليه

جايز فى يوم يعرف غلطه ومدى تأثيرة عليكم
واحمد ربنا ان كملت تعليمك
غيرك مبيكملش تحت اى ظروف

ابتدى شق طريقك
دور
اجتهد
ابتدى من الصفر
وهتوصل ان شاء الله

اما والدك دا تحطه فى عنيك

متستغربش كلامى

بس الاب والام ليهم حقوق علينا
مهما هما قصروا فيها معانا

ربنا يبارك لك فى حياتك
ويحقق لك كل اللى تتمناه من خير

ويخليلك والدتك ويديها الصحه

ربنا الموفق

سواح في ملك اللــــــــــــــــــه- يقول...

سلام عليكم
هبدا برسالة اوجهها لكل اب بيسيب
ولاده ويسافر عشان يجمعله قرشين
ويحرم مراته من اجمل ايام عمرها
عشان القرشين دول
ويسيب الام هي اللي تربي وتعلم
وتبقي ام واب في نفس الوقت
لو عيل من ولادك انحرف اوضاع تبقي انت المسئول
والفلوس مش هترجعة
لو عيل من ولادك اتجه للادمان واتلم علي شلة بايظة انت المسئول
ثانيا للاخ صاحب الرسالة
كلمتين اتنين مش هتحس بيهم دلوقتي
انت محظوظ لانك لقيت ام زي امك
عرفت تربيكم وتعلمكم وتحطكم علي الطرريق
بص بقي للي اقل منك في العلم ل والمكانة
وثقول الحمد لله
فيه اباء بتبقي موجودة في وةسط عيالها ومش موجودة
في اباء مدمنين وبيشغلوا حريمهم تصرف
عليهم وعلي ادمانهم
وولادهم مش متربيين كويس
من حسن حظك ان لك ام كامك
احمد الله ولاتعتمد الي علي نفسك ومجهودك وشبابك
اتقن عملك
ولما ربنا يكرمك ساعد ابوك
ابووووووك ايا كان فكره وعقليته
هيظل ابوك
هو اخطا في نظرك
مش هتعلقلة المشنقه
متزعلش مني مش هتحس بالكلام ده
الا لما تكبر

كلمات من نور يقول...

الردود طبعا كلها كافيه وممتازة بس لي تعليق واحد بس : الشاب أو الشابه العاقلين هما اللي يتعلموا من أخطاء الأبوين ويبتعوا عنها تماما ويعيشوا عكسها .يعني الوضع انتهى وصعب اجتراره بكل آلامه يبقى نبص لبكرة بقى ونراعي ربنا في أبوينا بالرغم من كل اللي فيهم فالحياه دوائر تدور و انت في يوم من الايام حيكون لك أسرة و أولاد وحتحطهم في عينيك وتقول يارب يكونوا بارين بيا ...خليك مع الله دايما واقرا تعاليمه و أوامره في كتاب الله ..داه قالنا لو مشركين وبيقولولك اشرك بالله خليك برضه بار بيهم وحافظ على دينك ...وفقك الله لما يحب ويرضى

ستيتة حسب الله الحمش يقول...

صديقي صاحب القصة

بص بقى يا سيدي
إنت معقد؟
ومين لأ
لو جبنا دكاترة نفسيين يحللوا الشعب من 8 - 88 سنة ها يطلعوا فينا كم عقد يعقدهم شخصيا
الناصح والمنصوح وكل شعوب الإنتكاسة عندها Issues نفسية بالهبل من غير تدخل بابا وماما وطنط كمان

والدك حكايته تتكتب في السيما؟
لو كتبت لك حكايات باباهات اللي اعرفهم وماماهتهم كمان ها تدي والدك وسام الجمهورية من الطبقة الفولة صدقني نيهاااااي
ده فيه ماماهات يعتبروا جينيس ريكورد في الإهمال والذاتية واللي عملوه في نفسية شحوطة كبار يحتار فيه الأطبا
وعليه فالنحمد الله على أمهاتنا العظيمة
هاتيك الأمهات اللي يارب في يومك نقدر نعمل اكتتاب ونعمل لهم تمثال من الذهب ولن يوفيهم حقهم
ولكن يكفينا طمعنا لهن في الأجر عند رب العالمين
فهن كالأرامل القائمات على العيال وانحرموا من متع الدنيا
يا عزيزي الحاجات الطبيعية لبني الإنس من أكل وشرب وجنس هي حاجات لا يمكن الإستغناء عنها حتى لو جنس الأمهات المظلومات أنكر حاجته لها
يبقى دول جزائهم عند ربنا وكفى به حسيبا

إنت الكبير وعلشان كده حاسس بوالدتك اكتر من الكل
وده مش معناه ان الباقي مش حاسس
بس احنا أساليب مقاومتنا للأحداث الجلل بتختلف
بين حساس بيبان عليه
وبين حساس جدا بيتصنع البرود والتباتة

ستيتة حسب الله الحمش يقول...

دلوقتي موضوع والدك ده ظلم منه وبين كمان بس خلاص
محدش بيربي أهله
دول لو فيهم مميزات يبقى قدر
ولو فيهم عيوب قاتلة يبقى قضاء ولا راد للقضاء الا بالدعاء وربنا يصلحهم جميعا ويحسن لنا ولهم الخواتيم

إنت فيه حاجات مستنياك عاوزة صمود
وعلشان تصمد لازم ترتاح من جوا
فيه تكوين مستقبلك انت
وفيه مساعدة اخواتك
وفيه والدك اللي بكره يا ها يحتاج منك فلوس بس يا فلوس ووقفة جنبه في كبره
ولعلمك ان شاء الله ربنا ها يفتحها عليك من وسع
من وسع قوي
والمشكلة لما تلاقي نفسك مضطر تساعده بشكل او بآخر
وها تساعده وها تعمل له كل اللي هو عاوزه ومش ها تسمح لنفسك حتى بإنه يطلب
ها تخاف على كرامته لأنك جزء من ذاته وكرامته
المشكلة الأكبر انك لحد فتح ربنا مش ها تقدر نفسيا تصفى
ولما يجي فتح ربنا ها تصفى ظاهريا
ولما يحتاج ها تبقى بتساعد وانت عاوز تبرطم
وهنا تكمن المشكلة لو كنت فهمت مني لحد دلوقتي حاجة

لو جيت تساعده وانت من جواك بركان وتنين مختفي انت اللي ها تمرض بجد

انا فاهمة حاجتك لضمة ابوك
وفاهمة يعني ايه مراهقة شاب من غير ابوه
بس يا أخي علشان نفسيتك اعتبر نفسك كنت يتيم
كنت يتيم واتربيت احسن تربية وربنا حفظك حفظه لليتيم
وانك إذ فجأة كده لقيت بابا يتبناك - طب لعلمك انا عاوزة اي حد يتبناني بس مش لاقية - وبكرم ربنا لقيت صاحب حيث الدنيا مفيهاش صاحب غريب اساسا

ستيتة حسب الله الحمش يقول...

تجربتك دي ها تجلب لك مساعدة ربنا ودي احسن من كل مساعدات ابناء آدم
أن يكون الله في عونك فهذا هو العون الحق

تجربتك دي ها تخليك حنين خالص مع والدتك وحنان العيال في الكبر على الآباء بيعوض قوي واسأل أي أم كبيرة حواليك
حضن الإبن ساعات كتير - وخاصة في حالة اللي زي والدتك - بيكون بحضن عشرين راجل من نوع هركيوليز

تجربتك دي ها تخليك زوج لقطة وانا من موقفي هذا باخطبك رسمي للبه بنتي
- شفت بستغل المدونة لمصالحي الشخصية ازاي - لأن اللي اتحرم وحاسس بحرمان الغير ده بيكون معطاء كالنهر ساعة الفيضان

تجربتك دي ها تخليك اب لقطة بتعرف قيمة البوسة والحضن وانك تبص للعيال في عينهم
وانك تحرص على كل كلمة بتطلع من بؤك لأنك عارف وجع الكلمة
وانك زي ما بتغطي واحد بليل تروح حتى للي مش متغطي تغطيه لحسن يكون صاحي ويفتكرك بتحب اخوه اكتر منه

تجربتك دي بعد عشر سنوات بالضبط - ودول في عرف الإنسانية رمشة عين - ها تخليك من الحامدين الله كثيرا الذاكرين لأنعمه
لأن اللي اتحرم بيقدر النعم
والي تعب بيقدر النعم
واللي بنى نفسه كل الناس بتقدره

اخر حاجة ها أقولها لك
يوم ما تفتكر عيط
يوم ما تثيرك ذكرى من اللي شفته ولا يهمك عيط
لا تتصنع قوة غبية بيسموها الراجل ميعيطش
ثبت علميا أن الرجل البكاء رجل أكثر ذكاءا على مقاييس الذكاء
من وقت للتاني طبيعي ان موقف او شيء يثير فيك ذكرى الحرمان من حضن أب لم يقدر نعمة أن يكون له رجل مثلك يحمل إسمه

ملحوظة: هو بيحبك بس عنيد جدا
بيحبك بطريقته
طريقة أنا وبعدي العيال وامهم
فيه ناس كده
نعمل ايه
قدر الصابرين

تحياتي وخالص دعواتي بالتوفيق في السعي وعلو الشأن في الدارين
آمين

غير معرف يقول...

انظر امامك و انسى ان ابوك معاه فلوس و كافح بنفسك , انت لسه في أول الطريق
و خليك انت كويس و عامل ابوك كويس

مخبوطازاد يقول...

السلام عليكم ... الحقيق بعد ما قريت البوست بتاع لو ابويا يبقى كويس .. هقول لحضرتك انت معاك حق .. وفي نفس الوقت ما تحملش والدك اكتر من طاقته.. في ابهات دمروا ابنائهم بكل معنى الكلمة .. في ابهات بيعملوا لاولادهم فضايح .. ويؤسفني اقول ان في ابهات بيعملوا لبناتهم فضايح ..
ودي مشكلة من ضمن المشكلة الاكبر اللي اسمها المجتمع العربي .. اللي مليان مشاكل .. في كل حاجة ..
زفي النهاية لا يسعنا كلنا الا اننا نقول ( وصاحبهما في الدنيا معروفا )


تحياتي

halaS demahoM يقول...

مش عارف اقول ايه؟؟؟
يمكن عندي نفس الظروف بس عادي
مبحبش انصح حد اكبر مني لاني بحس انه المفروض يكون فاهم اكتر مني
بس دلوقت مهما كان الاب اب
والراجل ده فعلا كان مسافر عشانكو
لان ال20 سنه اللي سافرهم دول ضاعو من عمره هوه
فارق اهله وصحابه ومراته وولاده
اكيد عشان يعمل حاجه
وكونه نجح او فشل فيها
دي بايد ربنا
بس اللي عاوزك تتاكد منه
ان ابوك بيحبك اكتر من ا حد في الدنيا دي
وهو الوحيد اللي يتمني انك تكون احسن منه
بس الظروف بتحكم ساعات
وانت بص لنص الكوبايه المليان
وربنا يخليلك والدتك
اسالها الدعاء وربك هيفكها ان شاء الله